冬天保暖飲品效果大比拼　最長可保暖 1 小時！第一位竟然唔係薑茶！

冬天天寒地凍，熱飲係必需品，飲返杯熱飲成個人都會暖笠笠。但到底熱飲嘅保暖效果如何？日本節目《この差って何ですか？》就實測咗 6 款熱飲嘅保暖效果，而第一位竟然唔係薑茶！

日本節目《この差って何ですか？》做咗一個實測，邀請咗 6 位女性分別測試薑茶、紅茶、綠茶、咖啡、甘酒及熱朱古力嘅保暖效果。參加者需要喺同一個環境下分別飲用相同份量及溫度嘅熱飲，之後再不斷測試體溫，直至參加者體溫回落到最初嘅溫度，如果體溫回落所需嘅時間越長就代表該款熱飲嘅保暖效果越好，相反，如果體溫回落所需嘅時間越短，就代表該款熱飲嘅保暖效果冇咁出色。

Photo from TBS《この差って何ですか？》

Photo from TBS《この差って何ですか？》

第六位：咖啡（保暖時間 9 分鐘）

相信唔少人每朝都會飲杯咖啡提神，雖然咖啡嘅提神功效好厲害，但原來保暖功效就唔係特別出色。參加者飲咗咖啡 5 分鐘後，體溫就已經下降，再過 4 分鐘就已經回復正常體溫，可見咖啡保暖效果的確一般。點解咖啡冇保暖功效？原來係關「咖啡因」事，因為咖啡因會令血管收縮，影響血液循環，所以會降低體溫。

Photo from Pinterest

第五位：綠茶（保暖時間 14 分鐘）

綠茶同咖啡一樣含有咖啡因，所以保暖效果都唔係太好。

Photo from Pinterest

第四位：甘酒（保暖時間 27 分鐘）

甘酒係日本嘅傳統飲品，成份包括米麴菌或酒糟，酒精含量極低，味道甘甜。甘酒係 6 款飲品中含糖量最高，人體吸收糖分後會發熱，不過甘酒就缺少咗可以促進血液循環嘅成分，所以保暖效果都唔算理想。

Photo from TBS《この差って何ですか？》

第三位：薑茶（保暖時間 47 分鐘）

薑茶相信係冬天必備嘅熱飲，因為生薑可以驅寒，飲完成個人都會好暖，但係喺呢個測試入面，薑茶竟然只係得第三位，到底點解呢？雖然飲薑茶可以令體溫急升，但體溫急升會導致出汗，出汗會令體溫流失得比較快，所以薑茶可以喺短時間之內達到一定嘅保暖效果，不過就唔能夠維持得太耐。

Photo from TBS《この差って何ですか？》

第二位：紅茶（保暖時間 52 分鐘）

紅茶含有茶黃素，茶黃素可以幫助身體改善血液循環，有效提升血液流動，所以有保暖效果。

Photo from TBS《この差って何ですか？》

第一位：熱朱古力（保暖時間 59 分鐘）

第一位竟然係無論春夏秋冬都會飲嘅熱朱古力，而且保暖時間仲高達 1 小時，完全估唔到！原來因為朱古力含有可可多酚，有效促進血液循環，達至保暖。

Photo from TBS《この差って何ですか？》

呢幾日天氣咁凍，大家都要飲多啲熱飲保暖啦～睇嚟熱朱古力應該會成為首選！

資料來源：TBS《この差って何ですか？》

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）