佘詩曼喊戲獲封「教科書級演技」！眼淚超有感染力！網友：演技冠絕中港台

視后佘詩曼近日喺大陸劇《燕雲台》中嘅演技大受讚賞，其中一場喊戲，眼淚留喺眼眶中勁有感染力，獲封「教科書級神演技」！網友大讚阿佘喊得靚：「演技冠絕中港台女演員。」

佘詩曼同大台合約完結後就北上發展賺人仔，雖然普通話唔好，但憑出色演技，以《延禧攻略》「嫻妃」一角彈出，人氣急升！

貴為兩屆視后嘅阿佘演技當然毋庸置疑，佢近日參演另一套劇集《燕雲台》，演技再度成為熱話。

阿佘喺新劇中飾演「蕭胡輦」，佢為救妹妹，被逼嫁畀太平王，而出嫁一幕嘅喊戲更令觀眾大為讚賞。

阿佘出嫁雖然係大喜日子，但畢竟對方唔係自己心儀嘅對象，喺喜轎上眼眶含淚，強自露出笑容，完美演繹出身不由己嘅複雜心情！

喊得靚仲充滿感染力添！阿佘嘅神演技獲封「教科書級」表演，網民又大讚佢演技冠絕中港台女演員。

其實阿佘當初演《延禧攻略》奸角「嫻妃」時已獲讚壞得嚟一啲都唔討厭，今次演少女角色都難佢唔到，再印證佢演技出色，兩屆視后絕對實至名歸！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）