港女自問樣唔差「似林嘉欣」！列男友10大條件：戒打機/英文叻/拍拖費用男7女3

時事熱話生活熱話

By Jennifer on 10 Feb 2021

Digital Editor

今晚食乜餸：小二，嚟一碟花生！

近日有網友喺「香港討論區」開post，列出做佢男友嘅10個條件，更直指要符合以上條件完全唔難, 請港男唔好搵藉口, 呢啲條件根本係幫緊港男進步，引起網民熱議。

Photo from 香港討論區

呢位網友今年26歲，拍過3次拖，每次都因為男友唔上進而主動講分手，佢自問樣唔差：「朋友同事話我樣似林嘉欣」，表示無咁多時間畀啲廢港男浪費，於是列出以下10個條件，亦供其他女生作為參考。

Photo from 林嘉欣IG

1. 要孝順

樓主指香港唔少男人經常對家人呼呼喝喝，家用又畀得少，不過佢表示：「對自己父母態度差我都可接受，但對我父母一定唔得！」咁孝順即係孝順樓主父母？

Photo from 《My盛lady》

2. 唔准睇AV

樓主認為睇AV即係對其他人有幻想：「容乜易連對男人都有？」

3. 戒打機

大部分男仔平時都會打下機放鬆下，不過要做樓主男友就要放棄呢個愛好。樓主覺得打機好浪費心神，雖然知道要戒會好難，但打機會令人變懶，戒咗佢好過，佢仲直言：「課金嘅話咪洗旨意繼續喺埋一齊！」

4. 唔可以咸濕

樓主表明應該尊重女性，但當女仔主動嗰陣，男友應該盡量滿足。

5. 樣中上身材一定要好

樓主自言「樣唔差」又有人讚佢似林嘉欣，對另一半外貌都有啲要求，佢話樣好唔好其實取決於份人注唔注重儀表，平時執執都唔會差得去邊。比起樣貌，樓主更著重男友身材，直指做佢男友一星期至少要做三日gym：「連自己身材都可以唔理，呢啲人點拍得落拖？」

Photo from 《老表，你好hea》

6. 學歷不能夠太差

樓主定義「唔差嘅學歷」係要有真正大學Degree，其餘IVE、毅進、副學士、高級文憑一概不考慮，起碼讀到大學：「唔係第時點教仔女？」

Photo from 《愛回家之開心速遞》

7. 英文一定要叻

除咗大學文憑外，仲要講到流利英語，樓主直言：「喺個咁國際化嘅地方生活，英文都唔識講知唔知醜？」佢指好怕人講英文講到一舊舊，認為要做佢男友英文唔洗講到好地道, 但最少全英對答要聽得明同流利咁講得出。

8. 唔可以太黐身

樓主非常注重私人空間，佢表示好多港男怕自己女友畀人搶會成日Check住晒，太黐身令人反感。

Photo from 《華麗轉身》

9. 月入$25,000以上

樓主明言自己依家都係搵緊呢個數，做佢男友又點可以收入少過佢？又指佢朋友都話佢要求好低。

Photo from 《愛回家之開心速遞》

10. 拍拖費用男7女3

拍拖AA制嘅當然係少數，但樓主都唔要求所有支出都由男友承擔。樓主話自己都有返工，唔需要男友一人畀晒，不過就指作為男人畀大份係正常。

Photo from 《最愛女人購物狂》

樓主最後更表示以上10項要求只係最基本，引發大量網友留言評論：

支持嘅網友認為樓主列嘅條件「出乎意料地貼地」以為會要對方有樓有車；「漏咗最重要一樣，就係要愛你」；「條件都唔算太苛刻」；「如果你人品正常又無不良嗜好，中等亞洲女性高度身型，條件絕對可以再set高啲」。

但亦有網友指樓主話人港男但自己都好港女；「有以上條件嘅人點解要搵你？」；「樓主可以試下上勞工處搵」；「呢個世界好多比你靚比你好，而又無你咁高要求嘅女仔」

Photo from 香港討論區

對於有網民話佢港女，樓主回應指：「我有學歷有樣，唔需要靠男人，但我只係想另一半係見得下人，咁都叫港女？」

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

壽星老公被迫夾錢送手袋畀老婆！拜金妻慘遭網民鬧爆：咁都得？離婚啦！

01 Feb 2021

貪靚係女士嘅天性，唔少男士都會買名牌手袋、送名牌耳環畀另一半，希望可以得到佢哋嘅歡心，但有時女士如果將依啲事視之為理所當然，又可能會令男士十分反感，甚至係沮喪。早前喺網上嘅討論區上面，就有位男士同一眾網民分享自己嘅心酸事，當中嘅細節更加係引起咗網民熱烈嘅討論，唔少人都替男事主覺得唔值，紛紛勸佢：離婚啦！

Photo from 《春嬌救志明》劇照

事主日前生日嘅時候，佢老婆就約佢正日生日去行名牌舖頭，想佢買對價值港幣 $3000 蚊左右嘅耳環，當係結婚周年嘅禮物送畀自己。不過當兩個人一齊去到名店嘅時候，發現對耳環冇貨，但事主老婆並冇放棄購物嘅機會，而係轉移陣地，去到另一間名牌舖，買咗一個貴咗足足十倍，要價港幣 $33,000 嘅手袋，仲要買完之後先叫對方畀番一半錢自己。

Photo from LIHKG

事主當日同老婆行到好夜，返到屋企已經差唔多成十點。當時又攰又餓，又要拎住嘢食同外賣，老婆同姨仔就兩個孖公仔行喺佢前面，拋低當日係壽星嘅事主一個。嗰一刻嘅情況真係諗吓都覺得有少少淒慘。

Photo from 《那些我愛過的人》劇照

不過好彩，返到去都仲有蛋糕食。食完嘢之後，老婆畀咗封生日利市佢，打開入面只係得港幣 $1,000，就反而令事主覺得有啲委屈同唔開心，更話咁樣嘅生日，不如自己一個舒舒服服地過會更加開心。

Photo from 《我可能不會愛你》劇照

事主聲稱佢搵緊約 2 萬蚊港幣一個月，而老婆搵緊 6 萬蚊，當中係有啲差距，而事主都明老婆對靚靚名牌可能會有啲渴望。之不過，自己買完之後又要係當日壽星嘅事主夾番錢，就實在令佢非常肉赤，仲要唔係講緊幾年一次，係講緊分分鐘一年幾次！大時大節都要送，又郁下就過萬，實在係令事主儲唔到錢。

Photo from 《原諒他77次》劇照

加上當日係事主嘅正日生日，就算唔慶祝都希望可以舒舒服服咁過，但老婆當日就拉咗事主去補送自己嘅結婚周年禮物，明知事主好鍾意食嘢，都令到佢要挨肚餓，好夜先可以開餐。作為壽星嘅事主唔單止覺得唔開心，更加係有啲被忽視嘅感覺。唔多滿意嘅事主梗係有同老婆反映，指出自己覺得咁樣仲慘過自己一個過生日，會一世都咁難忘，但老婆似乎仲未發現問題嘅嚴重性，同番老公講：「你生日可以有咁嘅成就，係你嘅光榮啦。」