想便便？去書局喇！有無人都係去親書局就有便意...唔好覺得自己奇怪 日本研究出原因喇！

話說有無人去親書局就會開始有便意？唔係講笑，一直以為係自己信邪，凝住凝住，但小編上網一search又真係有唔少人有身同感受。再發現原來呢個議題已經一早喺1985年，日本一本雜誌《本の雑誌》有位女讀者投稿提及過呢個問題。而且該出版社嘅總編仲俾咗個專有名詞佢，以投稿者嘅名命名，「青木まりこ現象」（Aoki Mariko genjyo）。最近仲有日本網站《NAVERまとめ》做咗個專題討論，歸納咗好幾位學者提出嘅假說，發現去書店係真係會加強人嘅便意。

其中幾項原因就係......

1.紙張+墨水氣味刺激

Photo from shutterstock

原來一早已經有位日本散文家Mariko Ishibashi講過，書籍印刷嘅紙張同墨水味會刺激排便，所以入到周圍都係書嘅地方，自然就會有便意。小編表示，咁書局店員咪長期無便秘呢個問題囉～

2.姿勢

Photo from shutterstock

因為當你喺書店揀書嘅時候，難免會有彎低身嘅時候。而彎身呢個動作會好容易令腸胃產生排便嘅狀態。另外，當人手上拎住書，眼瞼下垂咁讀書，呢個姿勢亦會有想大便嘅感覺。

3.條件反射

Photo from shutterstock

日本精神科醫生和夫三島推斷，如果平時去廁所嘅時候鍾意睇書，就會比較容易將「排便」同「讀書」做成一個連結。導致一去到書局就會下意識想去廁所。

4.壓力理論

Photo from shutterstock

有啲書局係無廁所提供，就算有，有啲人都會有個意識覺得書局唔係去廁所嘅地方。所以，當去到書局，就會出現一種「無得去廁所」嘅壓力，而呢仲壓力就會導致有排便嘅意欲。

所以唔好以為係自己先有呢個情況啊，好多人都有㗎！不過小編覺得就人人唔同嘅～～又未必個個都受到呢啲因素影響，如果唔係書局啲廁所應該幾多都唔夠用，多～謝～～～～

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
*本文章的圖片均經其本人或其公司授權，其他媒體不得轉載