![幫寵物改錯名,睇獸醫勁尷尬?!護士嗌名變鬧人:「豬扒到你啦」](https://image.presslogic.com/holiday.presslogic.com/wp-content/uploads/2022/01/b660a237.jpg?auto=format&w=718)
幫寵物改錯名,睇獸醫勁尷尬?!護士嗌名變鬧人:「豬扒到你啦」
養寵物都會為佢哋改返個名,好多人會改食物名如燒賣、朱古力。早前喺討論區就有網民分享自己幫貓貓改名後應到好後悔,帶佢去睇獸醫時一聽到護士叫貓貓個名即刻覺得超尷尬!引起唔少網民共鳴,齊齊分享聽過嘅奇怪寵物名。
Photo from TVB
港女為貓貓改錯名感後悔
正所謂「唔怕生壞命,最怕改壞名」,幫寵物改名都係一樣,有網友喺連登討論區發文大呻幫貓貓改錯名,問「仲有冇得返轉頭」,有關帖文已有超過3,000個正評,掀起網民熱議。
Photo from TVB
樓主表示佢為貓貓改名做「臭雞」,次次帶佢睇獸醫,姑娘一出嚟叫名就會引起診所其他人嘅關注,有時寵物醫院打畀佢,一開口就話:「Hello~係咪臭雞主人呀?」令佢大感尷尬!
Photo from lihkg
Photo from lihkg
Photo from TVB
網友對於樓主改呢個咁新奇嘅名直呼佢十分有勇氣,而樓主就解釋指佢改名嗰陣咁啱《巨輪2》角色「高天鷲」大熱,佢於是就用佢嘅金句嚟改名,估唔到會搞到咁老尷。
Photo from TVB
獸醫護士嗌名變鬧人勁尷尬
有唔少網友都分享佢為寵物改類似嘅名,都有同樣嘅煩惱,有網友稱佢幫寵物改名做「豬扒」,另一位則指佢改名做「八婆」,獸醫診所護士叫:「豬扒到你啦!」一樣令主人十分無奈。
Photo from lihkg
Photo from lihkg
Photo from TVB
幫寵物改做鬧人嘅名字的確會令人哭笑不得,有主人就幫寵物改名做「粉腸」,亦有網友稱佢為家中貓貓取名為「污糟貓」,結果帶去睇醫生時診所護士指:「唔可以改啲咁嘅名」。
Photo from TVB
Photo from lihkg
用人名、人物改名
用人物改名好似都算正常,例如叫「哥哥」、「弟弟」、「姐姐」、「妹妹」,但除咗兄弟姊妹之外都會好奇怪,有網友話佢嘅寵物叫「媽媽」,護士一叫「媽媽入嚟啦!」場面都十分怪異,又有人指聽過有寵物叫「前男友」、「前女友」。
Photo from TVB
有人直程用明星名!好似梅姐梅艷芳咁佢曾表示屋企養嗰3隻愛犬分別叫做「Eric」(曾志偉)、「阿叻」(陳百祥)、「阿倫」(譚詠麟)。
Photo from TVB
以身體部位取名夠騎呢
亦有網友表示佢用身體部位改名,其實亦一樣咁尷尬,「膝頭哥」已經算正常,其他例如叫「胳肋底」、「腳板底」都好奇怪。樓主另外又分享稱佢養咗3隻貓,其中一隻特登改名做「旺財」,都幾過癮!
Photo from lihkg
Photo from TVB
Text: HolidaySmart Editorial
(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)
更多相關文章
41歲莊思敏突然宣佈改名,新名想轉運催旺4大運勢!網友:個名參考咗元素週期表?
11 Jan 2022
莊思敏突然宣佈改名
現年41歲嘅莊思敏2020年與圈外男友Brian(楊秉逸)結婚,近日佢就喺YouTube拍片宣佈已經改名,仲叫大家日後要以新名稱呼佢。
莊思敏表示最近唔少朋友都問佢點解IG、Facebook、抖音等社交網站個名都唔同咗,以為佢嘅ac畀人入侵咗,莊思敏解釋其實係因為佢改咗新名。
「莊思敏」變成「莊鍶敏」為催旺4大運勢
佢指將個名原本個「思」字改成「鍶」字:「我希望呢個新名,會為我帶嚟一啲轉變同突破,記得以後寫嘢畀我,用加咗『金』字部首嘅『鍶』字。」,新名讀音無變,只係加多咗「金」字部首。
莊鍶敏之後接受傳媒訪問時透露佢改名係想儲到錢、事業同健康好啲,婚姻都好啲。有網友第一時間諗起「元素週期表」,指「鍶」(英語:Strontium)係一種化學元素,其化學符號为「Sr」。
陳小春應采兒、羅子溢楊茜堯夫婦都豪花巨款改名
其實娛樂圈中藝人改名並唔罕見,好似陳小春應采兒夫婦、羅子溢楊茜堯夫婦都改過名。羅子溢楊茜堯(前名:羅仲謙、楊怡)夫婦喺大女「小珍珠」羅翊心半歲生日時宣佈為咗家人更好,決定改名為羅子溢、楊茜堯。當時有傳羅子溢楊茜堯搵嚟高人為佢哋改名,共花費$40萬!
有指佢哋夫婦一齊改名係為咁追仔,但羅子溢否認,佢表示生仔呢啲隨緣,不過承認希望改名可以帶旺事業。早前亦有報道指陳小春夫妻有見羅子溢(原名:羅仲謙)、楊茜堯(原名:楊怡)夫婦改名後事業、家庭都變得更好,亦打算效法。
報道稱兩人豪花過百萬,搵咗為羅子溢、楊茜堯改名嘅堪輿學家陳咢魁出手:陳小春(原名:陳小臻)改名做「陳泰銓」;原名丁文嘅應采兒則改名做「陳丁冉兒」,更指已辦理好身份證等手續。
Text: HolidaySmart Editorial
(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)