今年嘅《萬千星輝頒獎典禮》已經告一段落，視帝視后分別係馬神馬德鐘同Ali李佳芯，而「最受歡迎電視角色」就由馬國明同陳煒奪得。

而歷屆頒獎禮有幾位藝人係同時奪得呢兩個獎，成為雙料視帝視后，同奪兩獎係對佢哋嘅莫大肯定。

視后方面：

1. 佘詩曼

Photo from 佘詩曼 ig

提到視后又點可以無佢，阿佘係第一個同屆獲得「最佳女主角」同「我最喜愛的電視女角色」（「最受歡迎電視女角色」前身）嘅雙料視后。佢初次攞「最佳女主角」就係喺2006年嘅《萬千星輝頒獎典禮》。

佢當年憑住《鳳凰四重奏》入面一人分飾四角「魏瑜鳳、汪子君、白慧珍、戴思嘉」成為視后，同時憑住同一套戲拎埋「我最喜愛的電視女角色」。

Photo from tvb

而去到2014年，阿佘再次憑《使徒行者》「釘姐」丁小嘉一角勇奪「最佳女主角」同「最受歡迎電視女角色」。

Photo from tvb

阿佘兩屆攞視后都係雙料，足見佢嘅演技備受觀眾認同。

近年佘詩曼無同tvb續約，轉而返內地發展，今年佢出演嘅《延禧攻略》大受歡迎，佢飾演嘅嫻妃亦都紅遍中港台。

Photo from 佘詩曼 weibo

2. 胡杏兒

Photo from 胡杏兒 ig

胡杏兒喺2011年《萬千星輝頒獎典禮》憑住兩個角色分別奪得「最佳女主角」同「我最喜愛的電視女角色」（「最受歡迎電視女角色」前身）。

佢喺《萬凰之王》飾演孝慎成皇后佟佳·沅宛，並勇奪「最佳女主角」。

同時佢亦以另一套戲《怒火街頭》王思苦一角成「我最喜愛的電視女角色」，成為雙料視后。

依家杏兒已升呢做媽媽，有仔萬事足，一家三口勁幸福！

Photo from 胡杏兒 ig

Photo from 胡杏兒 ig

3. 田蕊妮

Photo from tvb

阿田喺2013年以《巨輪》成雙料視后。佢飾演性格潑辣嘅「倀雞英」姚文英，呢套劇令佢人氣急升，唔單止一躍成「最佳女主角」，仲拎埋「最受歡迎電視女角色」添！

視帝方面：

1. 陳豪

Photo from 陳豪 weibo

鍾意飲咖啡嘅陳豪喺tvb多年，做過唔少經典角色，不過小編最記得嘅就係《溏心風暴》入面嘅「得得地」唐至安，佢周旋喺成個唐家，暗戀常在心嗰種小心翼翼，演得好入肉啊！

Photo from tvb

呢個角色令陳豪喺2007年《萬千星輝頒獎典禮》中首奪「最佳男主角」，並且拎埋「我最喜愛的電視男角色」（「最受歡迎電視男角色」前身）！

2. 黎耀祥

Photo from 黎耀祥 weibo

喺tvb多年嘅黎耀祥一直都係做綠葉角色，喺2008年終憑《秀才愛上兵》一人分飾兩角而獲「最佳男配角」，得到肯定。

2009年更加再下一城，憑《巾幗梟雄》「柴九」一角勇奪「最佳男主角」同「我最喜愛的電視男角色」（「最受歡迎電視男角色」前身），成為雙料視帝！

劇中佢一句：「人生有幾多個十年！」成為當年金句。

而佢同鄧萃雯仲喺2010年《萬千星輝頒獎典禮》冧莊做視帝視后！

Photo from 黎耀祥 weibo

入行多年，終成視帝，佢嘅努力終帶回報，實在令人感動！

3. 鄭嘉穎

Photo from 鄭嘉穎 weibo

「218 5個0」鄭嘉穎喺2011年憑住《怒火街頭》「Law霸」羅力亞一角喺《萬千星輝頒獎典禮》勇奪三獎，分別係：「「最佳男主角」、「我最喜愛的電視男角色」（「最受歡迎電視男角色」前身）、「tvb.com微博人氣大獎」，成為雙料視帝。

呢一年佢同胡杏兒包辦晒「最佳男/女主角」+「我最喜愛的電視男/女角色」，好威水！

今年8月佢同女友陳凱琳拉埋天窗，最近仲宣布做爸爸添！

Photo from 鄭嘉穎 ig

呢6位雙料視帝視后都係備受認同嘅演技派～

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）