【別了小丸子】《櫻桃小丸子》漫畫將於今個聖誕正式完結 單行本第17卷為最後一期

《櫻桃小丸子》作者今年8月15號因乳癌而病逝，終年53歲，而日本最大綜合出版社集英社宣布，《櫻桃小丸子》漫畫單行本第17卷將喺今個月25號聖誕節發行最後一期，之後正式完結。

小丸子一直陪住大家成長，貼地嘅主題、樂觀嘅態度，仲有溫暖嘅家族同一班搞笑嘅同學，帶俾我哋無限嘅歡樂同回憶。

Photo from 《櫻桃小丸子》

Photo from 《櫻桃小丸子》

《櫻桃小丸子》作者櫻桃子以自己嘅小學時代為原型，創作咗小學3年級嘅主角小丸子，講述小丸子喺學校同屋企嘅日常生活。因此佢嘅離世無疑令《櫻桃小丸子》再難繼續連載落去。

《櫻桃小丸子》自1986年喺集英社出版嘅少女漫畫雜誌連載開始，已累計賣出3200萬部相關作品，佢最新一集漫畫單行本係2009年推出嘅第16卷。

Photo from 海外網

雖然電視動畫不斷推出新作品，但《櫻桃小丸子》漫畫喺之前始終停留喺第16卷，9年後嘅今年終於要出最後一集。

第17集嘅封面已經公開，將會收錄連載喺漫畫雜誌《Ribon》。

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）