遊日族必睇！Suica卡存入手機 拍一拍就可以搭車購物 真係超方便呀！

唔少成日去日本旅行嘅人都知道日本嘅「Suica卡」(俗稱企鵝卡、西瓜卡)，就好似香港嘅八達通一樣，相信唔少人都會有一卡在手！

Photo from jreast.co.jp

其實Suica卡可以存入iPhone或者Apple Watch對各位遊日族都唔算係咩「新鮮事」，喺推出iPhone7時就已經有得用，不過當時就只限日本版嘅iPhone，香港同其他國家嘅版本就用唔到。

直至iPhone8或之後先出現唔同國家版本嘅iPhone可以用，而香港版嘅Apple Watch就喺Series 3開始用得。

Photo from Apple.com

設定方法仲好簡單添！

首先喺設定中將手機嘅地區設定為「日本」。

設定好之後就喺手機嘅Wallet中加入「新卡」

選擇「Suica」。

就可以依步驟登入信用卡資料。

之後就會出現「條款和條件」相關細則，選擇「同意」。

此時，你只要將實體卡放喺iPhone上半部嘅背後，系統就會自動將你嘅資料上傳。

上傳完成之後，你嘅Suica實體卡就會轉移到手機之內。

最後等5-10分鐘，大家就可以直接用手機拍卡出入閘機（不用開app或解鎖），非常方便。不過要提提大家，存入手機之後嘅Suica實體卡就會同時報廢，只可作留念之用。

而Apple Watch嘅設定亦同樣簡單方便，只要將卡存入手機後，直接去Watch app嘅「我的手錶」設定內，選擇「錢包與Apple Pay」，此時就可以將手機嘅Suica轉移至Apple Watch之內，不過轉移後，手機中嘅Suica卡就會消失，並唔會兩邊同時使用。

Photo from Apple

另外，如果將卡存入手機之後，增值仲可以唔駛再櫃面排隊入錢，直接用手機中嘅Wallet app（手機內已存入其他信用卡）增值就OK喇。而用Apple Watch嘅大家就可以直接喺錶面上操作增值，真係十分簡單方便呀！

大家仲可以download埋Suica官方app，就可以喺手機用其他信用卡嚟增值外，仲可以翻查Suica消費列表。

就算換手機亦可以用Suica app直接轉移添㗎。

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）