《大帥哥》今晚大結局！楊秀惠IG率先發千字文感激觀眾支持

生活熱話娛樂新聞

By Celia on 11 Jan 2019

Digital Editor

世界很大，生命很短，做自己就好！

無綫劇《大帥哥》話咁快今晚就要大結局喇！依套劇自開播以嚟引起咗唔少話題，深得民心，仲帶摯埋幾位角色人氣急升！

Photo from 楊秀惠 instagram

而喺劇中飾演「艾妞」一角嘅楊秀惠就率先發長文，感激觀眾接納同鍾意「艾妞」呢個角色，並指自己起初接到呢個角色時其實有啲擔心兼抗拒，因為怕角色會惹人反感！

Photo from 楊秀惠 instagram

楊秀惠點解「艾妞」一開始就畀人風騷、貪錢同不斷為錢而去討好男人嘅感覺：「人人都想自己出身高貴，唔使睇人面色做人，唔使哀求人，唔使時刻擔心會流離失所，可以永遠過住豐衣足食嘅生活啊。可惜，生活係現實嘅，為咗適應環境同生存落去，佢需要帶住虛偽嘅面具，對住人笑，只想賺多啲錢令自己有安全感，因為呢個世界冇人會保護佢為佢著想。如此真實的社會寫照。」

Photo from 楊秀惠 instagram

之後楊秀惠又講到當「艾妞」遇上「羅義」同遭受打擊之後嘅轉變，仲將角色嘅心路歷程結合埋人生哲學，研究得個角色咁深入，證明佢真係有做足功課！

Photo from 楊秀惠 instagram

一班網民都留言大讚楊秀惠將角色演活，仲話好唔捨得套劇咁快大結局添呀！

Photo from 楊秀惠 instagram

楊秀惠IG原文：

在 Instagram 查看這則貼文

長文。慎入聽晚「#大帥哥」就大結局了。好多謝大家對大帥哥的支持，亦感激大家能夠接納艾妞並且鍾意佢。實不相瞞，一開始接到艾妞呢個角色時，我有啲擔心甚至乎係抗拒。因為「 #艾妞」喺劇集中前半段嘅角色設定，係一個風騷、貪錢、同不斷為錢而去討好男人嘅人，試問一下，有邊個會鍾意呢種人啊。人人都想自己出身高貴，唔使睇人面色做人，唔使哀求人，唔使時刻擔心會流離失所，可以永遠過住豐衣足食嘅生活啊。可惜，生活係現實嘅，為咗適應環境同生存落去，佢需要帶住虛偽嘅面具，對住人笑，只想賺多啲錢令自己有安全感，因為呢個世界冇人會保護佢為佢著想。如此真實的社會寫照。當佢終於遇到對自己真心真意嘅人，可以唔使再虛偽，可以真實坦誠去面對呢個人嘅時候，上天卻選擇帶走咗佢。或者人生根本就係一場充滿歡樂悲傷艱難同崎嶇嘅旅程吧。佢會喊，佢會覺得傷心。但最後佢選擇帶住微笑，堅強哋去繼續所有挑戰，因為地球唔會因為悲傷而停止轉動，太陽照常會升起，日子一樣要過，雖然傷痛依舊存在。好認同佢嘅一句，喺邊度跌，就喺邊度企返身拍完呢套劇之後，我成日都喺度諗，人生唔似劇集，30集就完結。又有幾多人會真係用時間同心思去慢慢了解同認識另一個人呢？經歷咗半年「艾妞」嘅人生，我發現用「有頭髮邊個想做癩痢」呢句說話來形容艾妞嘅人生非常貼切嘅。「 Don’t judge a book by it’s cover」唔好單憑外表去判斷一個人的全部。可能呢個就係「艾妞」會選擇唔理會其他人嘅評價，想笑就笑，想喊就喊，不願束縛自己情緒，只為珍惜自己嘅人而付出嘅原因吧。今次，我盡了百分之二百的努力去飾演「艾妞」，因為演員永遠都係度等個機會，等一個唔知幾時先會嚟到嘅機會，等待一個被接納、被認同嘅機會，等一個下次唔知會否再出現的機會。一切如過眼雲煙，喺曲終人散之後一切將恢復平靜，學習「艾妞」繼續微笑住堅強地迎接人生嘅挑戰?? #艾妞是打不死的小強 #希望明天的結局是大家最期盼的 #楊秀惠 #有種情叫愛情 #有種情叫親情 #有個熟悉的地方叫家

楊秀惠（@vvyeo）分享的貼文於 PST 2019 年 1月月 10 日下午 12:06 張貼