【麻雀計番】新手入門必睇！麻雀計番教學～自摸混一色對對糊究竟幾多番？睇完就明！

新年打麻雀是常識吧！但係唔識計番就少好多樂趣啦！香港牌一般都係三番起糊嘅～雞糊就係零番，所以係食唔到㗎！雖然唔同人嘅打牌規則可能都會有啲唔同，但都可參考吓呢個較大路嘅計番方法～快啲嚟睇吓點樣計番啦～

順子係由萬子、索子、筒子連續三張數字牌所組成；刻子就係由三張同樣嘅牌所組成；番子就係東、南、西、北、中、發、白。

麻雀玩法｜一番

1. 無花

Photo from Presslogic

由開局到食糊，一隻花牌都摸唔到，就會計一番㗎！

2. 正花

Photo from Presslogic

花牌有8隻，分別係「春、夏、秋、冬」同「梅、蘭、菊、竹」。東位嘅正花係「春」同埋「梅」，亦即係1號牌，摸到一隻計一番，摸到兩隻就計兩番㗎啦！而南位正花就係「夏」同「蘭」； 西位就係「秋」同「菊」； 北位就係「冬」同「竹」。

3. 圈風牌／門風牌

第一圈麻雀叫東圈，第二圈係南圈，如此類推。如果玩家喺東圈，碰／槓咗東，就會加一番，呢個叫圈風牌。
如果你坐南位，碰／槓咗南，就會加一番。呢個就叫門風牌。
如果喺西圈，西位玩家碰／槓咗西，咁就係集齊咗圈風牌同門風牌，計埋就有兩番喇！

4. 門前清

Photo from Presslogic

門前清嘅意思食糊之前係冇上、碰或者槓過牌，所有牌都係自己摸返嚟，咁就會加一番。但如果有花牌就無門前清。

5. 平糊

Photo from Presslogic

平糊意思就係全部都係順子，冇碰過或者冇刻子，咁就係有一番啦。

6. 自摸

自摸即係食糊嗰隻牌係自已摸返嚟，而唔係人地出統俾你。

7. 海底撈月

Photo from Presslogic

Photo from Presslogic

海底撈月就係當出面抽剩最後一隻牌，而你摸完呢隻牌食到糊，咁就係海底撈月喇～因為呢個亦都係自摸嘅一種，所以會再另計自摸，即係2番啦！

8. 三元牌

Photo from Presslogic

三元牌就係「中」、「發」同「白板」。如果糊牌入面有其中一元嘅碰牌或者刻子就加一番～

9. 槓上自摸

Photo from Presslogic

槓上自摸即係你明槓／暗槓／加槓之後再摸個隻牌令到你食糊～咁樣可以加一番㗎！再加埋自摸嘅一番，即係有兩番㗎啦～

麻雀玩法｜兩番

1. 一台花

Photo from Presslogic

花牌好萬能～除咗冇花同正花會加一番之外，如果你集齊咗「春、夏、秋、冬」或者「梅、蘭、菊、竹」一套牌，就會加兩番！呢個就叫一台花喇～

麻雀玩法｜三番

1. 花糊

Photo from Presslogic

Photo from Presslogic

花糊即係你摸咗7集花牌，有三番㗎。你可以選擇即刻食糊，咁就係3番；如果唔食，就可以繼續打。如果你咁好彩摸埋最後一隻花牌，集齊8隻花牌，就係大花糊啦！！係計上限番數㗎。

2. 混一色

Photo from Presslogic

混一色就係食糊嘅牌入面除咗「東南西北中發白」呢幾隻牌，其餘全部都係同一花色，即係筒子／萬子／ 索子，會計三番㗎～

3. 對對糊

Photo from Presslogic

對對糊即係有4對刻子／碰牌，再加一對眼，就係對對糊啦～都係加三番。

麻雀玩法｜五番

1. 小三元

Photo from Presslogic

由「中、發、白」組成兩對刻子同一對眼，已經有五番啦，唔洗再另加三元牌番數～

麻雀玩法｜六番

1. 小四喜

Photo from Presslogic

由「東、南、西、北」組成三對刻子同一對眼。

麻雀玩法｜七番

1. 清一色

Photo from Presslogic

清一色就係成副牌只得一隻花色，完全冇「東、南、西、北、中、發、白」，有7番㗎～

麻雀玩法｜八番

*上限番數即係睇你地一開自訂嘅上限番數係幾多～可以係8番又可以係10番，仲可以不設上限番數添～有幾大玩幾大！

1. 槓上槓自摸

Photo from Presslogic

顧名思義即係連續2次明槓或暗槓之後自摸～如果你喺其中一次補牌係摸到花牌，再補牌先食糊，就唔算槓上槓自摸，而係當槓上自摸，加一番咋。

2. 大三元

Photo from Presslogic

集齊「中、發、白」三組刻子，就有8番啦～

3. 刻刻糊（四刻糊）

Photo from Presslogic

即係有4對刻子再加一對眼，唔可以碰牌，亦唔可以開槓，要全部都係自已摸番嚟～

麻雀玩法｜十番

1. 字一色

Photo from Presslogic

即係全副糊牌都係「字」，即係「東、南、西、北、中、發、白」

2. 九子連環

Photo from Presslogic

九子連環即係集齊其中一種花色嘅「1112345678999」再加多一隻同一花色嘅牌。

3. 清么九（清么／ 么九）

Photo from Presslogic

么九即係只有一、九嘅糊牌，連眼都要係一對一或九嘅牌。

麻雀玩法｜十三番

1. 十三么

Photo from Presslogic

十三么嘅牌要靠自己一隻隻摸返嚟，要集齊「一萬、九萬、一索、九索、一筒、九筒、東、南、西、北、中、發、白」，再加其中一隻牌。十三么係唯一可以搶其他玩家暗槓嘅牌。不過通常砌砌吓牌，就會比其他玩家碰咗其中一隻，然後就絕咗章，食唔到糊啦～所以諗清楚先好做十三么呀～

2. 大四喜

Photo from Presslogic

大四喜就係要集齊曬「東、南、西、北」四組刻子，再加一對眼，就可以食糊啦！大四喜，你又食過未呢？

3. 十八羅漢

十八羅漢可能係最難食嘅牌，要槓四組牌再加一對眼，因為糊牌總共有18隻牌，所以叫十八羅漢。

4. 天糊

Photo from Presslogic

天糊就係一開局就食得糊，但只有莊先食到，因為一開局得莊先有14隻牌。天糊連雞糊都可以食，補完花之後都可以食。
但有人認為一開局就食天糊係比較邪門，唔食好啲～咁就信不信由你啦！

5. 地糊

Photo from Presslogic

Photo from Presslogic

地糊就係食莊家打出第一隻牌。

講咗咁耐，咁究竟自摸混一色對對糊係幾多番呢？咁就要睇下糊牌有冇花？有冇圈風牌或者門風牌？如果都冇就係自摸一番＋混一色三番＋對對糊三番，即係七番啦～

Photo from Presslogic

咁所以唔一定要砌大四喜或者清一色先贏到，只要你好運，2隻正花再加雙番東你都可以食到糊呀！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）