提早搭地鐵送天婦羅蕎麥麵！東京地鐵推獎勵計劃 引市民早返工免迫車！

每每到返工時段，無論巴士定地鐵都會迫爆，入到車廂都仲要同人左擠右擠，特別係冬天日子市民着多咗保暖衣物，入到車廂又焗又要同人迫，真係隨時暈低啊！日本東京地下鐵為疏導乘客，舒緩車內過分擠迫情況，最近就推出咗一個獎勵計劃，市民只要早少少出門提早搭特別班次，就有獎勵啊！

Photo from Shutterstock

喺繁忙時段搭地鐵真係唔講得笑，而近日東京地下鐵響應東京都政府，喺「時差Biz」時段推行獎勵計劃，從而吸引有興趣市民提早出門，乘搭特別班次，疏導乘客以免喺繁忙時段出現過分擠迫嘅情況！

Photo from Twitter@Tokyometro_info

市民只要喺1月21日-2月1日期間，於東西線設置嘅登記專用機登記，拎到收據後於網上登記Siuca及PASMO卡，並用PASMO卡乘搭東京地下鐵「東西線」嘅指定特別班次，就可獲贈天婦羅及蕎麥麵優惠券。

Photo from Shutterstock

而且唔同人次參加仲有唔同獎勵㗎！如每日參加者總人數達2000人，就可以得到「免費天婦羅券」；人數達2500或以上就可獲贈「免費蕎麥麵券」；若然達至3000人或以上，就可以得到「免費天婦羅蕎麥麵券」，所以真係要同埋三五知己，仲有成班同事一齊參與啊！

Photo from Shutterstock

如果港鐵都推行呢個獎勵計劃，唔知大家又會唔會參與呢？

圖片來源：Twitter@tokyometro_info、Shutterstock

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）