《職場女王攻略》「希望實力同學歷可以睇齊」！學歷係咪真係決定一切？有實力有經驗無學歷 都注定爬唔到上去？

《職場女王攻略》由樂壇天后珍妮花露柏絲（Jennifer Lopez）主演兼監製，睇題材會覺得係控訴社會只睇學歷，唔睇經驗+實力咁請人，但其實有唔少笑料同道理帶出。

故事講喺大型超市擔任助理經理又有實力嘅Maya，等咗多年終於好似有升職機會，點知都係畀個有大學學位、得理論又無實力嘅男人空降落嚟，令佢大失所望，慨嘆就算有料但無「沙紙」都係唔成事。

Photo from Intercontinental Film

而佢嘅生日願望就係「希望實力同學歷可以睇齊」，佢嘅契仔為咗幫佢「達成願望」，幫佢捏造背景，變成有哈佛學歷，仲有令人驚嘆嘅工作經驗、經歷，壩埋佢申請唔同嘅工作，點知真係有間大公司想請佢出任高層，仲有大屋畀佢住、唔同百貨公司嘅禮品卡，好似變成灰姑娘咁。

Photo from Intercontinental Film

開頭以為單純講社會好多視「學歷」為一張「入場券」，從而看輕「實力」同「經驗」，但原來仲有延伸另一啲社會問題。

「假學歷」給予佢唔同嘅認同、肯定同信心，但同時發生唔少蝦碌事件，例如佢唔知原來契仔幫佢建構假背景，喺Facebook Page講佢有一堆唔同嘅長處，好似賽艇、識普通話等，有驚無險咁過到骨，但就會諗唔知幾時畀人拆穿。

Photo from Intercontinental Film

而且成套戲嘅重心原來唔係「人地點睇Maya無學歷」，係「Maya點睇自己無學歷」，如果連佢都睇低自己，唔敢去面對，逃避並用自己學歷唔夠為藉口咁自怨自艾，咁又有邊個會睇重佢？

《職場女王攻略》亦唔係講到學歷唔重要，因為好似Maya契仔本來入讀史丹福，讀讀下打算退學，因為點解要去讀佢已經識嘅嘢，Maya認為佢都係要讀埋，一邊向自己夢想進發之餘，都要完成學位。

Photo from Intercontinental Film

而入面老闆個女Zoe就係唔少人心目中想成為嘅女仔，有一個有錢爸爸，都有個好學歷，一去到爸爸公司就可以做高層，但對於佢嚟講做生意同管理，唔係佢想做嘅嘢，只係媽媽逝世，爸爸需要佢，令佢放棄自己鍾意讀嘅科目，返去陪爸爸同幫助佢。

當中佢嘅犧牲只有佢自己同佢爸爸知，旁人只會覺得佢係靠父蔭、空降落嚟。要承受嘅壓力同被先入為主嘅想法，容易被否定佢嘅實力同能力。

Photo from Intercontinental Film

電影入面就係睇到Maya點樣因為學歷而失去佢應有嘅經理職位，再感受到因假學歷得到嘅好處，同時為咗唔畀人篤穿，不斷做唔同嘅事去掩飾，就好似逃避佢原本嘅人生，亦正如佢明明好愛男友，但都講唔出佢唔想結婚嘅原因，同樣係無辦法正視自己嘅過去同原來嘅人生。

Photo from Intercontinental Film

要接受過去，接受自己，先可以去衝，先可以成功。其實電影仲有一條伏線，講嘅係難以啟齒嘅真話同大話，以及親情，不過為免劇透，就等大家入場搵一搵～

Photo from Intercontinental Film

香港1月24日上映～

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）