【執子之手】澳洲老夫妻相愛70年 手牽手同時與世長辭

澳洲一對老夫妻，92歲嘅Francis Ernest Platell同埋90歲嘅Norma June Platell 手牽手一齊離開人世，佢地女兒Amanda Platell喺《每日郵報》撰文，講述佢父母浪漫嘅愛情故事。

Amanda父母原本會喺下個月慶祝佢地結婚70周年，可惜死神提早到來。不過Amanda認為係主比咗最好嘅結局，將佢地雙雙帶到天堂。

Photo from DailyMail

原本護士發現Amanda母親呼吸不正常，父親狀態亦不穩定。10分鐘後，護士折返檢查，發現兩人都已經安祥離世。因為死亡時間相距太短，就連醫生都無法判斷係邊位先離去，佢地嘅死亡記錄上記載嘅死亡時間都係一樣。

Amanda形容佢地雙雙離世係一個奇蹟，因為早喺3年前，醫生就曾預測母親可能會喺嗰年聖誕離世，之後母親捱過了，但佢嘅老人痴呆症越嚟越嚴重，仲逐漸失去自理能力同語言能力，佢最後一句講得到嘅說話就係 “My husband”（我的丈夫）。

父親曾努力照顧母親，令佢可以喺屋企休養，希望可以每分每秒都照顧到佢。但最後父親身子都捱唔住，只好將母親送去療養院。喺療養院期間，父親每日都風雨不改咁去療養院陪母親一齊食午飯，手牽手一齊睇電視，有時母親會依偎喺父親嘅膊頭入睡。

但父親年事已高，最後都不敵歲月同病魔，要入住療養院。幸得療養院細心安排，父親同母親可以同住一間房間，兩張病床並排，父親訓左邊，母親訓右邊。

Photo from DailyMail

有一段時間，父親被病魔折磨，母親就一直默默望住佢。父親唔食飯，母親就陪佢唔食飯：父親做咩，母親就跟住佢做咩。

兩人嘅葬禮上，風笛悠悠奏出Amazing Grace（奇妙恩典），父親嘅靈柩先送入火葬場，之後先到母親，因為兩人生前無論去到邊，父親都會行第一，確保前方無危險以保護母親。

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）