盤點10大新年禁忌！年初一禁忌最多 除咗忌洗頭、打掃仲唔可以做咩？

新年又到啦！除咗忙於打掃屋企、辦年貨同準備拜年之外，呢啲大時大節嘅日子當然有唔少禁忌係唔可以做㗎啦！所謂新一年，相信大家都會希望有個好運、順利嘅開始，咁就要好好記住以下10大傳統過年禁忌，即使信唔信都好，少做為妙，好運自然來啦！

Photo from Shutterstock

大年初一 禁忌最多
1. 早上忌洗頭、洗澡
「年初一唔可以洗頭」呢句說話相信大家都唔陌生啦！其實係因為「洗」同「死」讀音相近，感覺唔吉利，而且「髮」同「發」讀音相同，如果喺大年初一洗頭，感覺就有洗走財運嘅意思。若果想新一年財運亨通，大家唯有忍一日唔好洗頭啦！

Photo from Shutterstock

2. 忌清潔：掃地及洗地、倒垃圾、洗衣服
新一年當然要將所有運氣通通留低啦！由於傳統而言每家每戶都有運氣留於家中，如果喺大年初一打掃嘅話，就有將運氣、財神掃走之意。而且傳統上較傾向「年廿八洗邋遢」，所有打掃、洗潔工作應該喺年廿八完成！

Photo from Shutterstock

咁新年嘅垃圾應該點處理呢？傳統上初一至初四嘅垃圾都會視為「財氣」，到初五「送窮日」，垃圾就會變成「窮氣」，到時就可以「送窮」，將垃圾清潔乾淨啦！

Photo from Shutterstock

3. 忌催人起床、睡午覺
難得有假期，打工仔們當然想瞓多啲、瞓晏啲啦！各位長輩們喺大年初一，記得唔好用全名催人起身啊！如果用全名催人起身，就會令對方新一年事事都會被人催促，同樣唔吉利啊！

Photo from Shutterstock

而新一年唔洗拜年嘅「懶瞓豬仔」，記得都唔好喺年初一瞓午覺啊！咁係由於古時有「禁晝寢」，勸人唔好懶散，如果喺大年初一瞓午覺，就會有新一年做事散慢、影響事業運之意㗎啦！

Photo from Shutterstock

4. 忌煮新飯、食稀粥
而年初一煮嘢食都有禁忌㗎！如果喺新一年食稀粥，就會有種「窮人食唔起飯」嘅感覺，會令新一年整年都貧窮，影響財運。

Photo from Shutterstock

年初一其實都唔建議煮新飯，應該要食除夕剩餘嘅過年飯，寓意有飯吃不完，年年有餘啊！

5. 出嫁女兒忌初一、初四、初五回娘家
已出嫁嘅女孩子初一、初四、初五最好都避免回娘家，否則傳統上會為娘家帶嚟整年衰運，最好就初二、初三回娘家！

Photo from Shutterstock

年初二 成雙成對
6. 忌送禮送單數
嚟到初二當然咩都一對對就緊要啦！出嫁女兒回娘家忌送單數回門禮，所以除咗要兩公婆回娘家外，女婿帶返娘家嘅禮物都記得要成雙成對啦！

Photo from Shutterstock

年初三 赤口日
7. 忌出門拜年
相信大家都知道年初三稱為「赤口」，容易禍從口出，所以盡量唔好初三出門拜年，以免容易有口舌之災啊！

Photo from Shutterstock

年初四 迎接灶王爺
8. 忌外出
年初四係傳統民間嘅接神日，需留喺家中接眾神明、灶王爺以及家神嚟守護家人，而且傳說中灶王爺仲會點名㗎！所以大家想得到神明保佑，記得初四唔好出街啦！

Photo from Shutterstock

過年期間禁忌
9. 忌買鞋
新年初唔好買鞋相信有唔少人都知㗎啦！因為「鞋」同「唉」相近，如果喺過年期間買鞋，就會有一整年都「唉唉聲」之意，感覺諸事不順又唔吉利。所以即使睇中心意鞋款，最好都係過咗初十甚至下個月先好買啦！

Photo from Shutterstock

10. 忌穿黑、白服飾
黑、白色衣物係中國傳統上為喪服顏色，雖然而家已經成為百搭款式，不過新年期間都係少穿為妙啦，以免畀長輩覺得唔如意啊！而新年當然身上帶有紅色係最好啦！如果覺得紅色衣物難以穿搭，不妨帶紅色畫家帽、紅襪子、紅袋子等，低調得嚟又有節日氣氛，又或者穿橙色、大地色系嘅衣物一樣非常好睇又唔怕比人話啊嘛！

Photo from Shutterstock

新年傳統禁忌多，大部分都係同民間流傳有關，小編就認為禁忌未必要盡信，不過少做為妙就無有怕啦！加上新年一眾長輩們聚首一堂，做少件禁忌以免畀人話啊嘛！而且新一年抱持樂觀心態、事事小心就更好啦！所以以上10大禁忌，真係「信不信由你」啊！

圖片來源：Shutterstock

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）