做足23年！人工減1/3 LuLu姐姐蓋世寶灰心宣佈正式離巢

90後嘅朋友仔相信點都會睇過《至Net小人類》、《放學ICU》呢啲兒童節目，對節目入面嘅一眾主持人都應該好熟悉。

除咗譚玉瑛姐姐之外，大家可能都會記得「LuLu姐姐」蓋世寶。做咗兒童節目18年嘅佢份約今個月月尾到期，並已經決定唔再續約。

Photo from 蓋世寶 facebook

蓋世寶17歲參加第八期藝員訓練班畢業之後就派去做兒童節目，一做就做咗18年，直到2015年兒童節目進行大改革，佢被調離由一出道做到依家嘅兒童節目，去戲劇組做戲。

Photo from 蓋世寶 facebook

Photo from 蓋世寶 facebook

由《閃電傳真機》，到《至Net小人類》同《放學ICU》，蓋世寶係唔少人嘅童年回憶，不過自從離開兒童節目之後，佢嘅曝光率就大大減少。

上年大熱劇《BB來了》蓋世寶都有出演，不過得一句對白，舊年佢獲派做《一周八爪魚》主持，可惜做咗9個月，節目又遭煞停。

Photo from 蓋世寶 facebook

二月底即將與TVB約滿嘅蓋世寶決定唔再續約，離開工作咗23年嘅公司，佢話公司喺1月嗰陣有同佢傾過續約嘅事，不過條件方面就減咗3分1人工。

做咗23年，約滿離巢嘅蓋世寶攞埋TVB嘅長期服務金離開，佢表示仲未諗好下一步做咩好：「香港唔會餓死人，只要你肯做，所以我從來都無擔心過。」

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）