午後の紅茶 X Pocky又有新口味！回憶過去30年「那些年」中學時代 劃分3個年代嘅特質

日本Pocky同午後の紅茶一向都有推出聯乘產品，每次嘅主題、口味去到包裝都係重點。上年嘅主題就係熱帶風情嘅「ALOHA」，推出巴西紫莓乳酪茶同香蕉小麥麩皮味Pocky百力滋。今次係那些年，以唔同年代嘅學生時期做主題，真係回憶返晒黎啊！

今次午後の紅茶嘅口味係意大利軟芝士奶茶，加朱古力同咖啡味Pocky！而今次最特別嘅就係，如果將兩者（Pocky加午後の紅茶）一齊食，係會食到Tiramisu嘅味道㗎！

而今次嘅包裝主題係劃分咗3個年代，因為咁啱推出聯乘產品嘅時候係接近平成年（日本年號）嘅尾聲，所以今次「午後の紅茶 X Pocky」就以橫跨超過30年嘅平成做主題。

當中劃分咗3個時代，包括1989-1997年、1998-2007年同2008-2019年。喺包裝入面嘅學生服裝打扮同佢哋用嘅嘢可以睇得出，佢哋係屬於咩年代嘅學生。雖然都係以日本中學生做背景，但係相信有睇日劇嘅朋友仔都會有共鳴。就算無睇，都可以從中睇得做時代嘅轉變。

好似1989-1997年（平成元年-9年），男仔就鍾意梳飛機頭，女仔鍾意著泡泡襪，望落去勁鬆，好似未拉直咁。

1998-2007年（平成10年代），男仔頭髮又直有長，啲蔭長到咩咁、條褲要掛條鐵鏈、又要摺袖，女仔就唔係著泡泡襪而係啱啱去到膝頭嘅長襪。

而去到最近嘅2008-2019（平成20年代），女仔著短襪，男仔係俐落嘅短頭，不過都仲係流住唔可以無咗嘅蔭。

如果再仔細啲望清楚枱面，會發現到啲細緻位，例如手機由好多吊飾嘅摺機，去到依家成日換手機殼嘅智能手機。亦會見到由以前打吓籃球，聽吓MP3，去到依家都係用電話影相多。

而且將佢哋全部拍埋一齊係可以連成一副打橫嘅畫，真係會忍唔住儲！2月12日已經推出啦，去日本嘅朋友仔可以留意吓啦～

Photo Source : kirin.co.jp

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）