【人有相似系列！】6個清末男藝人跨世代繼續做藝人！

呢個世界有種人叫「人有相似」。有冇試過喺街認錯陌生人係自己嘅朋友？一上前搭膊頭，人哋一擰轉身，「咦？喂？唔識嘅？」; 就算唔係認錯朋友，細個一定試過認錯爸爸媽媽，拖錯第二個人隻手！

而最近網上流傳一張6個清末男妓嘅相，大家又覺得佢哋同邊個似呢？

Photo from 網上圖片

由左一開始先啦！有網民就話左一直程係韓國國民MC 劉在碩，似到十足十咁話！無論瞇眼、尖臉形、咀唇等都超有大神嘅影子。

但亦有人話似香港藝人李燦森～大家又覺得似唔似？小編覺得似劉在碩多啲～

得到最多網民認同嘅非黃宗澤同周柏豪莫屬（左2同左3）。黃宗澤扮女人嘅樣，佢嘅眼神、角度，簡直同相中人一模一樣啊！

如果將周柏豪嘅比比鳥頭，換成相中髮型，應該係100%match，因為周柏豪長長四方嘅面形，加上憂鬱chok 爆嘅眼神，同「先人」唔止有幾分相似咁簡單！

另外有網民就覺得中間嗰個好似吳鎮宇～雖然舊照嘅嗰個人瞇咗眼，但佢嘅神情、Cool爆表情同「Sam哥」有得揮！

網民最難「達到共識」或者最難認嘅就係最右邊嗰兩個～有人話右一嘅好似張晉，右二嘅似梁競徽～

（右二）

小編反而覺得除咗對眼有少少似，同埋身形一樣瘦削之外，其他部分都唔太似～不過有網民就提出除咗似梁競徽，仲有啲似香港先生陳志健！無論眼神、面部輪廓都有幾分相似～

Photo from IG@ottochanchikin

雖然睇唔清楚相中人嘅正面，但係dup低頭微笑嗰下又真係有啲神髓～

（右一）

聽聞呢張相係喺1905年（光緒三十一年）影嘅～相入面嘅男士因為係戲劇舞台嘅藝人，所以全部都男扮女裝咁出現。同時因為以前唔鼓勵女子喺戲台上著戲服唱戲，所以劇中嘅女性角色就要由男士打扮成女士咁演，亦即係「旦角」。

呢啲「旦角」除咗會喺舞台賣藝，仲會打扮得好，撞到相熟嘅客人就會拋眉弄眼，更有機會走落台伺候客人。大家相處得好嘅話，表演完咗之後，「旦角」們換好衫，亦會同客人搵間酒館「快活」，賣藝同時亦會賣身。有網民知道之後表示：「原來呢6位清末男子都算係半個藝人，根本就係跨世代繼續做藝人啊！」

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）