影后葉德嫻拍片Mean爆12種自私行為！網民大讚寫實：講出心聲睇到好爽！

不時搭車都會遇到無禮乘客，有唔少人仲會放上網公審！而運輸署最近邀影后葉德嫻(Deanie姐)拍片，教導市民如何做個顧及他人嘅好乘客，當中提到12種自私無禮行為，一一畀葉德嫻Mean爆寸盡！有唔少網民都大讚短片幽默又寫實，完全係講出大家嘅心聲啊！

Photo from 運輸署 Transport Department, HKSARG

1. 閂閘時衝入車廂差啲撞到孕婦：「你想攞獎牌啊？」
短片中一開始就提到乘客最常見嘅一種自私行為「閂閘時衝入車廂」，雖然香港生活急速，趕返工放工又唔鍾意等車，已成為港人習慣之一。不過咁樣衝閘唔單止自己有危險，分分鐘仲會撞到車廂內嘅人，有時見到呢啲自私乘客，都想學Deanie姐講句：「你想攞獎牌啊？」

Photo from 運輸署 Transport Department, HKSARG

Photo from 運輸署 Transport Department, HKSARG

2. 與有需要人士爭櫈坐
雖然關愛座推出後引嚟唔少爭議，但其實都係想提醒乘客要讓坐畀有需要人士啊！眼見有需要人士時讓座當然好，不過亦有唔少乘客完全不顧人感受，見位就坐，連其他人讓出嘅位都唔放過，咁就真係無奈到連Deanie姐都講不出聲⋯⋯

Photo from 運輸署 Transport Department, HKSARG

Photo from 運輸署 Transport Department, HKSARG

3. 企車門旁邊或中間：「麻煩盡量行入車廂中間！」
好多自私乘客一入到車廂，不顧他人感受又貪方便咁直接企車門附近位置，明明車廂中間仲有好多位，車外乘客都根本入唔到車廂，呢個時候真係要大嗌一句：「麻煩盡量行入車廂中間！唔該！」

Photo from 運輸署 Transport Department, HKSARG

4. 掛住玩電話而唔記得上車：「咁巴閉！坐直升機啊！」
等車最好嘅消閒玩意當然係玩電話啦，但都要記住留意巴士有無埋站㗎，否則分分鐘走咗班車都唔知啊！不過有自私乘客不但掛住玩電話而唔記得上車，司機閂門一刻仲反鬧司機無睇清楚，爭執就因此而來啦，而且同車長爭拗，分分鐘仲影響安全㗎！真係學Deanie姐講句：「有無搞錯啊你！咁巴閉！坐直升機啊！」

Photo from 運輸署 Transport Department, HKSARG

Photo from 運輸署 Transport Department, HKSARG

5. 掛住玩電話無扶好：「畀你撞到啊都幾係嘢㗎！」
有好多自私乘客自問功夫了得、身手不凡，上車唔捉實扶手又掛住玩電話，當急煞車或轉彎時好容易就會企唔穩而跌到，嚴重仲會發生意外！所以記住「揸住扶手啊嘛，唔好淨係掛住睇電話！畀你撞到啊都幾係嘢㗎！」

Photo from 運輸署 Transport Department, HKSARG

Photo from 運輸署 Transport Department, HKSARG

6. 搭車時郁手郁腳企唔定：「不如打個後空翻嚟睇下？」
另外有自私乘客，入到車廂好似要表演咁郁手郁腳企唔定，對其他乘客造成滋擾外，仲好容易會撞到人㗎嘛！Deanie姐呢句真係講出網民心聲啊：「嘩！阿姐你真係好武功啊！不如打個後空翻嚟睇下？引體上升啊？」

Photo from 運輸署 Transport Department, HKSARG

7. 車廂內大肆飲食：「你不如打邊爐啊？」
明明車廂已寫明「嚴禁飲食」，但唔知點解仲有好多人會喺車廂食嘢！而片中示範超搞笑，乘客直情喺車廂HigeTea啊！而Deanie姐都唔輸蝕，隨即幽默寸爆：「你都好誇張姐！你不如打邊爐啊？」

Photo from 運輸署 Transport Department, HKSARG

8. 將袋放櫈上而唔讓出座位：「唔該拎開個袋！」
好多人都會將袋放喺櫈上，人少嘅時候咁做當然方便啦，不過人多時就要讓出座位啦！座位唔係比袋坐㗎！

Photo from 運輸署 Transport Department, HKSARG

9. 雙腳放於對面座位上：「你對鞋消咗毒㗎？」
除咗袋之外，仲有唔少人會貪舒服將雙腳放於對面座位上！其實鞋子相對污糟又多細菌，咁做會有損車廂整潔之餘，同樣會搞到有需要乘客無得坐啊！真係想寸爆一句：「你對鞋消咗毒㗎？無論消咗毒與否都唔應該咁啦！」

Photo from 運輸署 Transport Department, HKSARG

10. 邊睇片邊大聲笑而忘記落車
同唔記得上車一樣，同樣有好多人又因為手機而唔記得落車，然後又大鬧司機啊！其實都係因為自己錯失而唔記得落車，下次不妨向司機有禮貌地講聲「Sorry」，要叫佢開翻車門啦！

Photo from 運輸署 Transport Department, HKSARG

Photo from 運輸署 Transport Department, HKSARG

11. 成個身挨住條柱：「條柱唔係你㗎！」
搭地鐵最常遇到就係自私乘客挨住成條柱，令其他人無得扶手！「條柱唔係你㗎」，係大家共用㗎嘛，唔好再做柱男、柱女啦！

Photo from 運輸署 Transport Department, HKSARG

12. 電話超大聲播片：「你估呢度你屋企咩！」
呢個行為真係搭車之外幾時都遇到啊！當正條街係自己屋企，開大聲睇片，有時仲會遇到有人鬧極唔聽！其實係人想知你睇咩啊！而且唔係要細聲啲啊，係要「用耳筒」或者「閂咗佢」啊！

Photo from 運輸署 Transport Department, HKSARG

Photo from 運輸署 Transport Department, HKSARG

以上呢12種行為真係自私又無禮貌！而呢條短片仲畀網民大讚超寫實！大家記得要做個顧己及人嘅乘客啦！

圖片來源：運輸署 Transport Department, HKSARG

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）