葉德嫻0片酬演出宣傳片 拍足3日 力數親身經歷過無禮乘客6宗罪：呢個係乜嘢社會，有啲咁嘅人出嚟！

影后葉德嫻最近就為運輸署拍咗段3分鐘宣傳片，Mean爆鬧搭車嘅自私行為，點出「搭車顧自己都要顧下人」嘅主題，大獲好評！

運輸署透露，貴為影后嘅Deanie姐今次拍攝宣傳片係0片酬演出，一共拍咗三日，其中一日更喺半夜拍攝，因為要等到港鐵收車之後先拍到。

Photo from 運輸署

Deanie姐收到邀請就答應演出並唔收片酬，因為佢認為：「好值得幫手拍」。

片中Deanie姐句句到肉，講出大家心聲，原來因為佢喺現實都身受其害，搭車時遇過唔少無禮乘客。Deanie姐講起都好勞氣，佢力數親身經歷過嘅無禮乘客6宗罪。

Photo from 運輸署

首先佢指出好多女士會喺車廂入面fing頭，佢話有啲長頭髮嘅女士喺人多時唔會理後面有無人，就突然間fing頭，Deanie姐話：「我想問佢用邊隻護髮素？點解啲頭髮咁硬嘅？」

Deanie姐仲話：「有啲人紥住類似古裝嗰啲道士馬尾，喺地鐵、巴士入面擺嚟擺去，就會整到人」睇嚟Deanie姐應該平時見唔少。

跟住佢指出「第2宗罪」：「有啲人坐喺度蹺腳、伸隻腳出嚟嗰啲，你諗下地鐵個位有幾闊呢？」的確伸腳、蹺腳會佔咗唔少位置，阻礙到其他乘客。

Photo from 運輸署

Deanie姐提到如果你同佢講，叫佢唔好蹺腳，俾返少少位嚟。咁佢又會俾說話你聽：「咁我生得高嘛」Deanie姐忍唔住話：「如果你瞓喺度仲高！」

Deanie姐仲見到一種非常唔衛生嘅情況：「見得最多係男人撩鼻屎，仲要抆出嚟有少少鼻涕痴住嗰啲，講起都核突」Deanie姐表示係佢親眼目睹，想俾張紙佢抹下個鼻，點知已經唔知彈咗去邊。

Photo from 運輸署

而Deanie姐覺得最難接受就係「咳、打乞痴唔戴口罩」：「唔揞口喺度咳、打乞痴，佢哋好似唔覺得呢啲係問題，反而覺得你應該可憐我：『我咳呀！』」，Deanie姐認為呢種行為最討厭。

至於喺車廂內飲食，Deanie姐曾經直接提醒佢哋：「有個肥佬喺度開樽水飲，我行埋去同佢講：『先生，地鐵唔可以飲食』，佢就睥我啦，鬧我死八婆乜乜乜」；又見過小朋友同父母坐埋一行食嘢：「我行埋去同佢講：『太太，地鐵唔可以飲食』佢話：『咁細路仔肚餓呀嘛！』我唯有話：『好呀，你教得好！』」完全feel到Deanie姐有幾無奈。

Photo from 運輸署

仲有「第6宗罪」—霸佔輪椅位。Deanie姐話見過最離譜係有人企喺輪椅位，有人坐輪椅上車都唔肯行開，由輪椅嗰個人「浪嚟浪去」，Deanie姐都有出聲話呢啲人：「我出聲：呢個係輪椅位，佢哋眼超超。」

Deanie姐坦言非常失望：「睇到呢啲你會覺得，弊喇！呢個係乜嘢社會，有啲咁嘅人出嚟！」佢認為要做多啲宣傳：「我覺得要做多啲宣傳，其實唔可以一面倒怪晒乘客，有啲可能乘客唔知，例如梅窩船可以飲食，但愉景灣船就唔得，所以要做多啲宣傳，我覺得咁樣先公道。」

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）