《死亡無限2次Loop》續集唔一定唔好睇！ 終於知點解不停Loop 搞笑又感人 仲有少少親情版《求婚大作戰》感覺

上集嘅《死亡無限Loop》低成本製作，但票房大收，仲好好口碑添！唔少人擔心今次續集因為珠玉在前，會令人失望，結果呢次無令觀眾失望，而且仲好好解釋咗點解上集同今集都仲係不停Loop，睇睇下仲有種似似地睇親情版嘅《求婚大作戰》添！

Photo from Universal Pictures

故事講述Tree經歷11次死完又復活，終於唔再不斷Loop死過又翻生，重覆過生日個日，畀BB面具殺手追殺。諗住可以過返平靜日子，同Carter開始發展，諗住可以過返新生活，點知突然又過返生日同死忌不斷輪迴，今次玩法仲唔同咗咁，所以佢決定「自己Reset」，搵出可以返去原本世界嘅方法。

Photo from Universal Pictures

睇之前諗今次會唔會都係「續集一定唔好睇」嘅魔咒，因為上集以低成本製作，但因為搞笑又有新意嘅情節令票房大收，但一聽到佢有續集就唔少人都擔心會玩爛條橋，認為應該見好就收。但睇完就覺得好搞笑，但又帶出咗少少道理。

Photo from Universal Pictures

上一次要不斷被殺搵出兇手，要殺咗兇手先可以停止Loop。而呢次同上次唔同，唔止要搵出兇手，仲會解開上次點解時空會不斷重重覆覆嘅謎團，

Tree喺電影入面要搵出點樣可以留喺呢個次元、走出重重覆覆死完又復活嘅輪迴，唯有靠自己不斷死去證實理論，而呢個唔同「自殺」過程都好搞笑，而佢每次仲要笑住咁自殺。

Photo from Universal Pictures

不過當中都承接上集所講，Tree不斷死都會造成佢身體唔同嘅負荷，所以佢「自殺」嘅次數都有限制，以致佢並無咁多quota試太多次。

上集都有講到Tree嘅媽媽逝世對佢造成好大嘅影響，但呢個不斷重覆嘅時空中，佢媽媽並無死到，令到佢唔想離開呢個時空。不過係呢個時空入面佢鍾意嘅人Carter唔係同佢一齊，而係佢朋友嘅男朋友。變咗一係要返去同Carter一齊、但媽媽已死嘅時空；一係Carter同朋友一齊，而媽媽仲在生嘅時空。

Photo from Universal Pictures

每次見到Tree Loop完又Loop，重重覆覆同媽媽喺生日當日相處，感受到Tree好想留低媽媽仍生存嘅時空，但經過佢愈嚟愈多次重覆，佢開始明白就算幾想都好，佢始終唔係屬於呢個時空，都無同呢個時空嘅媽媽嘅一啲經歷。

講出人生中一個重大課題——「要學識放手」

Photo from Universal Pictures

當Tree預知自己可能係最後一次Loop，即係代表呢次係最後一次見到媽媽，Tree同媽媽講嘅一番話真係會令觀眾眼濕濕。

而《死亡無限2次Loop》今次亦扭橋再扭橋，例如返去醫院「惡鬥」嘅一幕都幾估佢唔到。同埋好似Tree咁，經歷咁多次生生死死，為保命仲「殺過」咁多次人，就會覺得現實如果有呢個人，都真係幾危險人物，因為已經唔再驚「殺人」同「被殺」咁。

Photo from Universal Pictures

以及有啲位唔係咁合情理，但基於「睇故唔好駁故」嘅原則同娛樂性高嘅情況下，又有感人位同搞笑情節，係值得入場一看。

Photo from Universal Pictures

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）