學習14句「成年人的社交禮儀」！「閉上眼，再翻白眼」 社會令人每天都在假裝自己情商高

步入成人世界，好多事情都唔再好似小朋友一樣可以隨心所欲，而且更需要學習同人打交道、處事方式、控制個人情緒等等，即使有千言萬語湧上心頭，都要學會適時說話，以免禍從口出。而近日就有網友分享有關「成年人的社交禮儀」，引嚟熱烈迴響之餘，唔少人都大讚超有同感！

Photo from Shutterstock

成人世界猶如一場假裝情商高嘅智力遊戲，「成年人的社交禮儀」用一句說話總結日常會遇到嘅無奈處境，當中包括待人接物、談吐舉止、處事方式等。一齊嚟學習以下14句「成年人的社交禮儀」，當中嘅含意絕對值得大家銘記於心！而如果你深表認同，證明你已成為一位活於成人世界嘅「專業玩家」。

Photo from Shutterstock

#1 給你看手機的照片，不等於你可以左劃右劃
唔少人都鍾意分享手機照片、搞笑Cap圖畀信任嘅朋友，可惜總有部分「信任嘅朋友」唔聽話、太天真、或者好奇心衝上腦，睇睇下相突然左劃右劃。其實每個人都有自己私隱，分享手機相係出於信任，唔代表可以畀人亂睇亂用。最無奈係當你搶返手機時，朋友再奸笑問你一句：「有咩收收埋埋唔畀得人睇啊？」，拜託。

Photo from Shutterstock

#2 閉上眼，再翻白眼
遇到上司或朋友嘅無理要求、冷言冷語，唔少人都會想當面「翻個白眼翻到落腳趾尾」，但將內心嘅不憤同無奈太易表露無遺，最終理虧嘅可能只會係自己。特別係工作上種種事情，或難免令人無言以對，呢個時候不妨「轉個身，閉上眼，再翻白眼」。

Photo from Shutterstock

#3 二選一沒有那麼難，不要老說「隨便」
「係就係，唔係就唔係」、「好就一句，唔好就兩句」，呢類型嘅說話相信大家都唔陌生，而佢哋嘅出現好大機會係由於別人嘅一句「隨便」。其實問得你都係因為重視你、想知你點諗、又或者想問你意見，一句無營養嘅「隨便」如同「答咗等於無答」，除非大家嘅關係都係咁「隨便」，否則還是好好說話吧。

Photo from Shutterstock

#4 能說「我不知道」，就別說「我怎麼知道」
其實無人可以「理所當然地」無知，特別係喺科技先進又發達嘅社會，上網搜尋一下已經有幾千萬個相關回覆，加上「以為你知先問」嘅心態，下次不妨用「我唔知啊」代替「我點知姐」，即使係問及他人私事無得Search，用前者回應絕對比後者來得順耳。

Photo from Shutterstock

#5 電話號碼能複製貼上，就不要發截圖
其實呢句可以泛指某啲「為咗方便自己，而麻煩到人」嘅自私鬼，明明有個簡單方法便於雙方，何必為咗自己一時之快，而為對方增添麻煩呢？有時多動動腦、動動手，咁就你好、我好、大家好。

Photo from Shutterstock

#6 能說「好的、可以、我知道啦」，就別說「嗯」
「好的、可以、我知道啦」以及「嗯」，意思上其實分別不大，但他人接收時嘅感覺分別則非常大！前者聽落去有禮貌得多，而後者一個「嗯」字，有種敷衍、沒在聽、唔想理嘅感覺，完全係想人「已讀不回」嘅表現！

Photo from Shutterstock

#7 說句「謝謝」不會死，還會顯得有禮貌
明明「多謝」二字由細學到大，但都總有人唔識講、唔會講，將所有事情視為理所當然。其實講「多謝」用不上一秒時間，而且講完都唔會死，下次遇到拜託人之事，又或者得到別人嘅好意，不妨試下有禮貌地講句「多謝」。

Photo from Shutterstock

#8 能沉默，就別說話
有時候話多反而畀人一種幼稚、輕浮嘅感覺，話多唔代表學識多，學識簡而精嘅說話才會顯得穩重成熟。而更多時候係喺唔適當嘅時機或場合說錯話，咁樣不如「沉默是金」，用心觀察，用耳聆聽。

Photo from Shutterstock

#9 做不到的，就不要輕易承諾
每個人都有自己優點同弱點，而且無人萬能。有時遇上難以解決嘅請求，唔好輕易答應，正所謂「期望越大失望越大」，承諾令人對你有期望，做唔到反倒會令人失望之餘，仲可能會陷入難以補救嘅地步。遇到做唔到嘅事，不妨禮貌地婉拒，他人自然會對你日後能許下承諾嘅事信心大增。

Photo from Shutterstock

#10 不要以為自己懂得很多，說話總是充滿優越感
世界上嘅學問數之不盡，所謂「一山還有一山高」，千祈「唔好識少少扮代表」，世界好大，而未知嘅事仍有好多，嘗試謙虛說話，別人自然會更願意同你交流、相處。

Photo from Shutterstock

#11 不要眨低別人很愛很愛的東西
每個人都有自己嘅興趣同嗜好，而且價值觀不只得對錯之分，學習欣賞他人喜愛嘅事物，即使興趣不一都可以互相尊重，因為每樣事物都有令別人着迷嘅理由。

Photo from Shutterstock

#12 別人在說話的時候，不要插嘴，好好聆聽
當別人選擇同你傾心事，絕對係一種信任嘅表現，所以千祈唔好胡亂插嘴，慢慢畀人將內心感受或睇法完整地講出嚟，自己則在旁用心聆聽，其後再表達個人意見，咁先係一個識得尊重他人嘅聆聽者。如果一味「有你講無人講」，相信下次就無人想再同你講嘢。

Photo from Shutterstock

#13 能自己做，就不要找人麻煩
大部分簡單嘅日常生活事，都好應該先試下自己完成，唔好養成懷習慣，無論大小事務都交託比人處理，咁樣除咗有顯缺乏自理能力外，仲有種「當人係阿四」嘅感覺。每個人都有自己嘅生活煩惱，你忙時人哋都好忙，何必去加重別人負擔呢？

Photo from Shutterstock

#14 總結：能好好說話，就別洋腔怪調！
其實好多人都怕遇到又中又英嘅對話，明明講緊廣東話，無啦啦加個英文生字，仲要極重「r」音同「n」音，又或者「影后/影帝」上身，談吐動作非常誇張，令人聽得好辛苦。其實交流只需要適當嘅表情，配合精簡嘅句子，唔洗整色整水㗎！

Photo from Shutterstock

所謂「己所不欲，勿施於人」，言行都一樣。大家都只係「假裝」情商高，其實沒很高，所以每個人煩請好好學習待人處事吧！

圖片來源：Shutterstock
資料來源：#成年人的社交禮儀

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）