「世上最悲傷大象」離世 3歲起單獨被困至今達43年 飽受憂鬱症折磨

動物園令我哋可以近距離見到好多稀有動物，不過對於動物嚟講住喺動物園並唔係一件幸福嘅事。

Flavia就係其中之一，佢係一隻印度象，3歲時被人喺象群入面帶走，送咗去西班牙嘅哥多華動物園。入動物園後，Flavia單獨被困，至今已經有43年，呢43年佢都無得同同類接觸，亦都因為咁，佢又被稱為「世上最悲慯大象」(The Saddest Elephant in the World)。

Photo from Zoo de Córdoba

大象本身係家族群居動物，就算喺野外都成群結隊移動。一個大象家族群體通常有十多隻成員，而野外群體嘅大象成員數目更可能有幾百、甚至成千隻。

Photo from shutterstock

Photo from shutterstock

由於大象係群居動物，一旦獨居，大象會非常不安，產生自我傷害行為，同埋不斷轉圈圈。對被困喺動物園嘅大象嚟講，最重要係要俾空間佢同同類交流接觸。

被迫獨居令Flavia患上憂鬱症。43年嘅獨囚生活更令佢健康越嚟越差，最近呢幾個月，Flavia嘅情況每況愈下，到上星期五終於倒地不起，動物園最後決定為佢進行安樂死。

Photo from Zoo de Córdoba

動物保護團體譴責動物園長期單獨困住Flavia係違反動物天性，之前曾經嘗試爭取俾佢同其他大象一齊居住，但係唔成功，最終Flavia孤獨咁離開人世。

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）