童年回憶！經典打鱷魚遊戲機即將消失 製造商倒閉+難搵零件維修

唔知大家細個去冒險樂園有無玩過一款「打鱷魚遊戲機」呢？呢款街機依家喺香港已經好難見到。

以前打鱷魚遊戲機幾乎每間冒險樂園都會有，小編每次去都一定會玩，有時仲要排隊添！

Photo from 週刊朝日

其實打鱷魚機喺1989年日本推出，一推出就大受歡迎，幾乎每間機舖都有，無論係大人定細路都會追住伸出頭嘅鱷魚嚟打。

Photo from ゲーム機資料館

不過呢款打鱷魚機嘅製造商KHP喺2017年宣布破產，製造商破產之後遊戲中心買唔到新機，鱷魚機壞咗就唯有搵人幫手修理。

不過要維修都唔係咁易，由於鱷魚機推出市面已經有好長時間，所以保養期早就過咗，而鱷魚機嘅部分零件，現時喺市面好難買到。

Photo from BANDAI NAMCO Entertainment Inc.

有遊戲中心老闆表示打鱷魚機最易壞嘅係伸出嚟嘅鱷魚頭，因為大家都好用力咁敲打鱷魚頭，令鱷魚頭受損較嚴重。鱷魚頭係特殊部件，只有製造商可以提供，所以一旦鱷魚頭壞咗，咁鱷魚機就會漸漸消失。

呢款打鱷魚機即將消失，不過LINE喺2014年就推出咗《LINE ワニワニパニック》手機版打鱷魚遊戲，玩法同街機差唔多，都係點擊鱷魚頭打佢。

Photo from LINE

隨住時代嘅變遷，童年回憶逐漸消失，如果見到呢款打鱷魚街機嘅話真係要把握機會玩下～

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）