消委會實測6大機票格價網 最平票價可相差一倍 「skyscanner」表現較好

潮流興「貼地遊」，去旅行想慳得多，買平機票就好重要。坊間有唔少機票格價網，但唔知邊個網先係最平、最抵。消委會就實測咗其中6大網站，發現佢哋「最平」機票價格相差近一倍。

除咗價格相差大之外，好多時去到第三方購票網站會發現機票唔存在或者已經賣晒。又或者喺第三方購票網站顯示嘅機票實實價格比喺格價網睇到嘅「最平」價格更高。

Photo from 消委會

Photo from Shutterstock

究竟邊個格價網嘅價錢最低？消委會喺「skyscanner」、「KAYAK」、「Cheapflights」、「momondo」、「DuckDuckLook」、「Google Flights」6個機票格價網實測搜尋短途、中途、長途機票。

以綜合表現嚟講，「skyscanner」表現最好，實測中有35%搵到嘅機票價錢最抵；39%搵到第二低價格機票。

而最差嘅就係「Google Flights」，唔上搜尋結果少，多數唔多過100個，而且近一半實試搵出嘅機票價格都比其他5個網站高。

Photo from Shutterstock

同時消委會發現雖然各大網站都聲稱自己可以搵到最平機票，但實際價格相差好大，例如今年7月17號至23號來回香港同濟洲島嘅機票，「skyscanner」搵到最低票價$2,081，「Google Flights」嘅最低票價則係$4,102元，兩個網站機票差價接近一倍。

Photo from Shutterstock

喺實測短途航班方面，「skyscanner」有30%搜出最低票價；「KAYAK」、「Cheapflights」有55%搜出第二低票價；「DuckDuckLook」雖然有55%搜到最低票價，但亦有25%搜尋到最貴機票，表現兩極化；「Google Flights」就有成70%搵到最貴機票。

喺實測中途航班方面，「skyscanner」有84%搜出嘅票價係各大網站中最低價或第二低價；相反「DuckDuckLook」則有53%搜出最高價。

Photo from KAYAK Facebook

喺實測長途航班方面，「momondo」表現最佳，每次搜尋結果都係各大網站中最低、第二低或第三低嘅價格；「Google Fligths」有62%搜尋搵出嘅價格都係最高。

不過就算搵到最平機票，都唔一定真係買到，因為當去到第三方購票網站會發現機票唔存在或者已經賣晒。「KAYAK」喺實測中有17.6%出現呢個情況；「skyscanner」同「Google Flights」都有11%嘅實試測中出現同樣情況。

睇嚟想買到最平機票真係要比較多幾個格價網啊～

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）