【遊日交通】見鹿仔更方便！JR新列車由新大阪直達奈良聽日開通 車程只需1小時

大家遊日本關西，玩完大阪，一定唔少得去埋奈良公園同鹿仔玩。

JR西日本近日為大家帶來好消息！官方宣布，將於3月16日開通來往新大阪及奈良餘下路段。大家以後可以由新大阪站直達奈良站，去見鹿仔就更加方便啦！

Photo from shutterstock

早前JR西日本宣佈重整大阪東線嘅營運系統，連接新大阪直達奈良嘅列車快線。

另外，列車仲新增連接大阪地鐵中央線連接「高井田中央」站，同埋近鐵奈良線嘅「JR河內永和」站，四通八達，非常方便。

Photo from 日本經濟新聞

以往由新大阪搭鐵路到奈良，都要喺天王寺轉車到大和線再前往奈良，需時要70分鐘。新直通線開通後，全程只需1小時就可以由直達奈良！更加省時！

Photo from 日本經濟新聞

列車分為直通快速列車（新大阪至奈良）同普通列車（新大阪至久寶寺）兩種。直通快速列車每日共有8班車，平日同假日行駛班次略有不同。

Photo from JR西日本

平日嘅話，「奈良至新大阪」直通列車只在日頭開出，而「新大阪至奈良」直通列車只在晚上開出。假日則早晚都有直通列車往返！由新大阪到奈良單程車費為920日元（約港幣 $ 64.7)。

Photo from Wikimedia Commons

又多一個便利交通選擇，大家Plan行程果陣記得留意啦！

資料來源：日本經濟新聞、JR西日本

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）