【咁都得】淘寶推出小學生「罰抄神器」！用Apps模仿筆跡 自動快速抄寫

相信大家細細個都試過俾老師罰抄書啦！想抄得快啲，唔少人嘅「法寶」都係將幾枝筆綁埋一齊同時抄。

不過今時今日，科技日新月異，呢個方法已經Out啦！淘寶就出現運用科技嚟幫手抄書嘅「罰抄神器」，直頭連手力都唔駛出！實在太邪惡啦！

Photo from 聯結車 大貨車 拉拉隊 照片影片資訊分享團@FB

呢部發明叫做「寫字機器人」，其實係一部配合軟件嘅電動寫字機，網上價格由人民幣238-1300元都有。內地早前推出時仲引起唔少熱議。

Photo from 淘寶

Photo from 淘寶

佢奇在可以用店家自創嘅Apps去設定手寫字體，又可以自己輸入筆跡去設定字體，畫埋圖都得，不過只支援簡體中文、英文、數字等，繁體中文字要再自行輸入。

Photo from 淘寶

用家設定好字體後，再用Word/Excel文件導入需要抄寫嘅內容，最後用夾板固定枝筆同你份功課，較啱位就可以等佢慢慢幫你罰抄啦！網上仲話佢可以一分鐘寫到30-40個字，聽落好似好勁咁喎！

睇埋淘寶買家嘅「罰抄作品」，望落都真係幾似真人手寫！

Photo from 淘寶

Photo from 淘寶

Photo from 淘寶

有網友就讚嘆呢部神器夠「創新又偉大」，但始終都係機器寫出嚟，人手寫字先有力度、錯字潦草當然就寫唔到啦！如果老師仔細睇嘅話，一樣會發現到問題，話唔定到頭來罰得仲重呀！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）