漁護署終公開回應人道毀滅泰國誤上貨船狗狗一事 會認真檢視處理程序同方式：唔會以相同方式處理

今個月一架泰國貨船到港，船上發現誤上貨船嘅狗狗Heaven，因為有帶頸圈，相信係有人飼養。狗狗到港後被漁護署帶走。

漁護署以無任何健康證明文件或醫療紀錄，加上懷疑嚟自狂犬病爆發嘅地區為由，將狗隻人道毀滅。

Photo from 「泰旅谷真好玩」群組

事件引起公眾批評，認為漁護署未有跟足程序就將狗隻「處決」，網友更發起聯署行動，參加人數超過5萬。亦有關注動物權益組織發起「愛動物 零虐畜」遊行表達意見。

事隔兩星期，漁護署終於喺Facebook對呢件事作出回應。

漁護署表示大家對Heaven嘅關注已經全部收到，由於留言太多所以無法逐一回應。今次情況特殊，無同類個案作參考，發生呢件事之後佢哋已經開始認真檢視海外走失動物來到香港之後嘅處理程序同埋方式。

Photo from 漁護署 Facebook

希望喺保障公共衞生同本地動物健康之餘，同時都考慮到動物、飼養人、主人嘅需要，並承諾：「喺檢視期間，我們遇到同類個案，都會停一停，諗一諗，唔會以相同方式處理。」

立法會議員鄺俊宇就留言表示漁護署應該要向Heaven同關心佢嘅朋友嚴肅道歉，並全面檢討人道毀滅政策。

Photo from 漁護署 Facebook

Heaven嘅公眾告別禮已經喺24號舉行，有唔少市民到場悼念。

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）