瞓床60日即賺14萬港幣？！NASA聘自願者協助研究 筍工要求並唔複雜！

日日都趕住起身返工嘅打工仔，有無諗住世界上原來有份絕世好工，單瞓床60日，就可以即袋14萬港幣？！大家無睇錯，真係存在㗎！而且仲要係充滿無窮幻想嘅NASA作招聘啊！係咪好心急想睇下點Apply呢？小編即刻同大家介紹，絕世筍工嚟啦！

Photo from ESA@Twitter

原來呢份筍工，係源自美國太空總署(NASA)與歐洲太空總署(ESA)共同合作嘅一個研究項目，近日ESA喺Twitter發文宣佈，為進行一項「人工重力床休息研究」(Artificial Gravity Bed Rest Study，AGBRESA），需聘請自願人士協助研究。

Photo from ESA@Twitter

研究將於德國科隆嘅德國航空太空中心(DLR)進行，成功獲聘嘅參加者只需瞓床60日，畀科學家研究有關人工重力對人體嘅影響，就可以獲1萬6500歐元，即約14萬5千港元！瞓60日就有咁多錢賺，絕對係懶瞓豬夢寐以求嘅工啦！

Photo from ESA@Twitter

是此研究將聘請12位男性及12位女性，所有實驗、飲食及日常活動都需要瞓喺床上進行，床頭並且怕後傾6度，模擬太空人喺太空艙內承受體液置換嘅情況，而且研究人員會監督各參加者，確保所有參加者嘅肩膊每分秒都接觸到床墊。

Photo from ESA@Twitter

不過整個研究需時89日，除咗連續60日嘅瞓床研究，事前仲要有5日適應環境、以及14日休息，而且有一半參加者仲需要每日坐喺每分鐘30轉速嘅離心機內，再進行各項測試，方便研究人員收集數據。

Photo from NASA@Twitter

研究人員現正招募24-55歲自願參加者，必須識講德語，男女各12位，有興趣又識德語嘅朋友，可於今年5月24日或之前遞交申請。

Photo from NASA@Twitter

如果符合資格，又想一嘗與太空人有關嘅工作，不妨遞表試下啦！

圖片來源：ESA@Twitter、NASA@Twitter

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）