雷神出「奇招」幫囡囡過迪士尼機動遊戲身高限制 差啲出事 雷神反省：設身高限制或者都係有原因

雷神Chris Hemsworth一向都愛錫老婆仔女，不時同屋企人外出享受家庭樂。而雷神本人都好大細路，之前就喺IG po咗畫花《復仇者聯盟4》海報嘅片，令人哭笑不得。

《復仇者聯盟4：終局之戰》即將上映，一眾演員都開始展開宣傳，而日前雷神上一個節目就透露咗佢為咗可以同囡囡一齊玩機動遊戲而「出蠱惑」。

Photo from Chris Hemsworth IG

佢同「鐵甲奇俠」Robert Downey Jr.、「黑寡婦」Scarlett Johansson、「蟻俠」Paul Rudd齊齊上節目，佢哋提到之前試過一齊去玩迪士尼嘅機動遊戲。

Photo from Chris Hemsworth IG

呢個機動遊戲叫「Tower of Terror」，係以《銀河守護隊》做主題，會慢慢升到高處然後急降，非常刺激。

Photo from Disney

而雷神就提到早幾年佢同阿女一齊去玩，但因為囡囡年紀仲細，身高未過到最低限制。而雷神見阿女玩唔到機動遊戲唔開心，竟然「突發奇想」將幾排朱古力棒攝入阿女鞋底。

Photo from PressLogic

Photo from Elsa Pataky IG

阿囡加咗「內增高」即刻過到身高限制，雷神對自己嘅創意表示非常滿意，到入到去坐嗰陣內心仍然暗爽。

當升到最高嘅時候，雷神兩父女勁興奮，點知一急降，阿女就因為離心力而「升空」飛離座位，嚇到雷神即刻用手撳住阿女。

Photo from Elsa Pataky IG

最後佢都有反省：「設身高限制或者都係有原因」，不過Iron Man就忍唔住反問：「或者？」

估唔到雷神個人咁大細路～

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）