新加坡環球影城設2大全新園區！任天堂世界園區+Minions兵團園區 大3倍S.E.A海洋館！

日本大陂嘅環球影城大家就去得多啦，唔知新加坡環球影城大家又去過未呢？不論有無去過都好，嚟緊新加坡環球影城再增設2大全新主題區—「超級任天堂世界」以及「迷你兵團主題樂園」，相信一定能吸引到各位再次入場啊！

聖淘沙名勝世界嘅大型擴建計晝，將由2020年至2025年分階段完成，而今次係新加坡環球影城自2010年開業以來，首次進行園區擴建，擴建後會增設更多不論男女老幼、一家大細都啱玩嘅景點、主題商店同餐廳，聽到都令人好期待啊！

而其中相信以「超級任天堂世界」較為吸引，當中會將任天堂嘅遊戲、角色、冒險體驗帶入園區，令大家猶如置身任天堂世界，同孖寶兄弟同一眾角色一齊大冒險啦！

而「迷你兵團主題樂園」相信大家都唔陌生，可愛嘅Minions絕對係無處不在，而當中嘅核心項目「慌張的迷你兵團」更係獲獎無數嘅模擬驚險遊戲，旅客可以進入Minions 3D世界，加上溫馨又幽默嘅故事，非常適合一家大細一齊闖關啊！

政府斥資新幣45億進行擴建計劃，除咗為環球影城增設2大園區，連S.E.A海洋館都進行擴張啦！S.E.A海洋館將會同鄰近嘅海事博物館打通，化身比現時大3倍嘅「新加坡海洋館」！

「新加坡海洋館」為世界首個大型綜合海洋館，當中會增設3大區—「進化與滅絕區」、「探索與深海區」以及「海洋保護區」，再配合數碼及互動科技，帶大家到海洋世界進一步了解海洋歷史，真係好啱帶埋大人小朋友，一齊去邊玩邊學習海洋知識啊！

而另外仲設有「身歷其境冒險劇場餐廳」，當中以海盜冒險為主題，海盜故事加上逼真表演、場景佈置以及視覺效果，再配合多元化菜式，為大家帶嚟非一般嘅餐飲體驗，真係好想親身體驗一下啊！

睇完之後小編都迫不及待，好想等佢快啲擴建完成再出發旅行啦！

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）