【全城熱話】許志安首開腔回應「安心偷食」爆喊自覺嘔心兼停工反省

是日全城熱話真係莫過於今日最爆-許志安、黃心穎車廂中連環激咀逾20次，攬攬摸摸又十幾次嘅「安心偷食」喇！而啱啱事件中嘅男主角就獨自一人招開記者會交代事件。

Photo from Presslogic

他一現身率先向大家道歉鞠躬，坐下時即爆喊指睇到報道後，自覺好討厭、惡心，話：「親口同大家講對唔住，為我家人，Sammi家人、同朋友道歉，自己做咗不被原諒嘅事，呢個錯我深深反思，我係醜惡嘅人，今日係承擔責任。」

Photo from Presslogic

索一下鼻水，再謂：「嗰晚的確飲咗好多好多酒，但飲醉酒絕對唔係藉口，犯咗咁錯嘅嘢，我非常後悔，好難面對同接受唔到自己。」

Photo from Presslogic

之後佢又指：「睇到報道後，我覺得自己好丟臉、好錯、好討厭、好嘔心、好陌生，我有深刻反思，點解唔可以控制自己去犯呢個錯誤、起咗色心。我覺得承擔責任要分兩個部分，第一由依家開始暫停所有工作，直至搵番真正嘅自己同正確嘅自己，去重新檢視自己學做人。第二，心靈上，覺得自己不知所謂，因為我嘅錯誤同行為，令身邊所有愛我嘅人，承受一種咁大嘅壓力同痛苦，我希望喺嚟緊嘅日子，所有被我整傷過、整痛過嘅人都可以好好。」

Photo from Presslogic

佢又指：「呢個報道令我深刻反思，其實我最錯嘅地方係迷失咗自己，最後我要再次同所有愛我嘅人講，令到你哋難堪，我做錯咗，對唔住。同埋，對唔住Sammi。」停頓了10秒後，他續言：「唔知以後點去走自己嘅路，呢刻冇咗靈魂，我係壞咗嘅人，希望大家可以畀時間我搵番自己。最後再一次同所有朋友講聲對唔住。」然後再次躬鞠10秒，期間記者問他問題，如Sammi可有原諒他？演唱會可會取消等，但他亦未有回答就走。

Photo from Presslogic

喺記者會結束後，安仔就喺其IG上傳一個全黑嘅相留言：「這是一件不可能被原諒的錯事，我不敢奢求原諒，因為我也沒有辦法可以原諒我自己。我只可以深切反省，並以最誠懇的態度，去為所有因爲這次事件而受影響的人，去說一聲，我真的做錯了，難辭其咎，對不起！我沒有任何籍口，犯下了如此嚴重的行為，令到我的家人、朋友及所有愛我的人徹底失望，我感到非常遺憾和歉咎。我亦願意承擔由這次事件所引起的一切後果和責任。最後作為一個丈夫，我要向Sammi說對不起，這是一個徹頭徹尾的錯誤，我感到慚愧及痛心。請大家給予時間和空間我去學習怎樣去改過及重新去做一個人。」

Photo from 許志安IG

希望佢今次真係知錯，好好反省，不過相信大家最關心應該係sammi同馬國明嘅情況，唔知佢哋會唔會有回應呢！？

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）