【超有共鳴！】戲院列出睇戲8大禁忌 網民大讚講得好精準！

今日就係《復仇者聯盟》終局之戰嘅上映大日子，唔少粉絲一知道上映日期，就火速撲飛，間間戲院都因而受惠，場場爆滿！而有間戲院今日就出文呼籲大家，要做個有良心、有公德心嘅戲迷！等小編依家總結8點畀你哋知啦：

1.遲入場
相信唔少人都試過當你好認真咁睇戲嘅時候，有人因為遲到搵位坐嘅時候，完美遮住咗成個螢幕，搞到miss咗小小細節！你知咖啦，細節位就係每部戲嘅精髓！Miss咗隨時唔明之後做咩咖～

Photo from PressLogic

2.遲拎飛
唔好預到咁忟先拎飛～尤其是睇《復仇者聯盟》，因為你預10分鐘時間拎飛，但你要知道唔會排10分鐘就拎到飛。如果你真係咁認為，少年你太年輕啦～戲院提示你可以用QR code入場～咁就避免遲入場啦！

Photo from PressLogic

3.睇戲時不斷出出入入
有啲人可能太趕入場，去唔切廁所，搞到睇到半路中途去廁所。唔係唔畀你去廁所，而係你出出入入嘅時候，會完美阻到各位觀眾，更會令你Miss 咗好多劇情！為人為己，記得去完廁所先睇戲啊！

Photo from PressLogic

4.留低垃圾/食物
做個有公德心嘅戲迷！唔好食剩啲爆谷、汽水、熱狗等留喺戲院！自己垃圾自己清！

Photo from PressLogic

5.踢凳
自製4D效果？如果踢啱時間就話姐～但睇睇吓戲，係咁畀人踢凳，「嘭嘭」聲真係會好嘈，嚴重影響睇戲嘅心情！有同感請舉手！

Photo from PressLogic

6.偷拍
呢個唔洗講啦，偷拍本身就係犯法嘅行為。唔好為咗向你身邊嘅人炫耀而以身犯險啊！想曬命，影張票尾就算啦，好不？

7.睇戲時討論劇情
睇睇吓戲，明明開始進入狀態嘅時候，冇啦啦開始隔離討論劇情，真係會好影響身邊觀眾嘅情緒，冇辦法再投入喺劇裡面～網民話：「洗咩討論啫，睇落去埋知囉！」

Photo from PressLogic

8.劇透
「劇透_全家」 拿～呢句嘢就唔係小編講嘅，係唔少戲迷、觀眾嘅心聲！畀大家一個機會好好欣賞、感受一部戲！《復仇者聯盟》End Game咖啦，等大家好好享受啦！

Photo from PressLogic

「致各位觀眾：
經～過那些年～　唔經唔覺，咁就一齊咗十年喇，大家喺度都留低過唔少腳毛。從第一套Iron Man到依家，由菲林進展到去4k，好開心可以陪住你哋一齊笑過、喊過、緊張過、感動過…
咁多年嚟，一齊經歷咗咁多嘢，我好想好想襯今次同大家講下心聲…

成日遲入場嘅觀眾…
其實我知，我明！我知你哋無心遲入場，無心攪到自己睇唔到片頭之餘，仲要喺入場時完美地block晒其他觀眾嘅視線。不如今次試吓準時一次咁多吖？

仲有仲有，諗住早10分鐘先拎飛嘅觀眾…
好想話你知… 當你落到戲院，望住拎飛條隊個刻，真係會睇唔透。個個都開場前10分鐘先拎，成件事就唔止係10分鐘架喇。唔想排到天荒地老嘅，不妨試下用QR code入場，又或者再早多啲啲嚟拎飛呀。

最後，習慣留低爆谷、汽水、紙巾俾我嘅觀眾…
多謝你，下次唔洗咁客氣喇，食剩嘅食物麻煩自己帶返走呀。我唔想你哋為咗我，苦了啲清潔姐姐呀，求放過。

其實我哋可以見證到一個持續咗十年嘅故事嚟到ENDGAME 一刻，真係唔簡單。戲院，係一個為大家留下回憶嘅地方，希望大家可以珍惜每一個movie moment，做個高質觀眾。唔怕話你知，我都好想以後繼續同你地一齊經歷每一個座無虛席嘅moment。

P.S. 今次套戲都至少要坐三小時，記得去完洗手間先入場呀
P.P.S. 唔好再喺睇緊戲個時討論劇情喇，有咩返屋企再慢慢講
P.P.P.S. 睇戲途中影相偷拍呃like撳電話就更加唔好啦
P.P.P.P.S. 千祈唔好劇透，千祈唔好劇透，千祈唔好劇透

祝閣下睇戲愉快
俾你踢過無數次的戲院凳上」

Photo from Facebook@MCL

唔少網民見到以為MCL要執笠～大讚佢講得夠精準，超有共鳴，相信唔少人曾經中過伏，有過不愉快嘅睇戲經歷！

Photo from Facebook@MCL

Photo from Facebook@MCL

Photo from Facebook@MCL

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）