三日長假 煲劇好時機～5套Netflix 中毒劇集！開始咗就停唔到！

嚟緊會放一連3日嘅長假～難得放假就緊係舒舒服服留係屋企煲劇啦！
Netflix有海量嘅劇集，總有幾套正嘢你會miss咗，Black Mirror、Stranger Things呢啲大家都會睇過嘅劇小編就唔多講啦～等小編推薦幾套Netflix嘅滄海遺珠劇俾大家～但注意，可能會有少量劇透，同埋有幾套會有啲18禁場面呀。

Photo from IMDb

1. 永不滿足（Insatiable）
呢套講述女主角本身係一個成日俾人蝦嘅肥妹仔Patty，之後佢意外瘦咗，變成一個靚女，佢遇到佢嘅人生教練Bob，帶佢走入選美嘅世界。就咁睇會以為又係嗰啲「醜小鴨變天鵝」嘅老套橋段，但其實一啲都嗰係勵志劇，其實呢套係美式黑色幽默嘅劇嚟，好多情節都好誇張，每集劇情都會大暴走！因為女主角對佢自己嘅現況「永不滿足」，所以佢成日都會失控，做出好過份嘅事，例如殺人、綁架等等。

Photo from Netflix

而佢嘅教練Bob嘅人生同樣好荒唐，佢好愛佢老婆，但同時鍾意咗佢嘅死對頭、同樣都係叫Bob嘅鄰居。以為佢會離婚，同佢男朋友一齊？Nonono，佢地選咗三人行！

Photo from Netflix

雖然好多劇情都唔make sense，但勝在唔洗用腦，而且劇情真係好好笑～

Photo from Netflix

2. 向西聞記

向西聞記係一套香港網劇，最近喺Netflix上架。每1至2集一個故事，第一個故事就係「畜牲傳心師」由張繼聰同胡杏兒主演。

Photo from Netflix

而且唔少新演員參演，好有新鮮感。小編尤其推薦最後一個故事「碌架床」，由林雪、王宗堯、鄧健泓主演，王宗堯、鄧健泓兩兄為咗間房鬥快仔，最後結局好荒誕、諷刺。

Photo from Netflix

Photo from Netflix

3. 老公的那個進不來

呢套係一套題材好大膽嘅日劇，雖然個名睇落好似好色情咁，但其實係一套文藝愛情片。

Photo from Netflix

頭幾集講述兩人喺大學時期相識、相愛，好似普通純愛劇集咁。雖然夫妻兩人相愛，但佢地面對一個好重要嘅問題，就係兩人嘅性事不合。呢套劇就係講佢地夫妻兩人點樣攜手渡過呢個難關，最終佢地得到一個共識：「性同愛係可以分開。」

Photo from Netflix

呢個故事其實係真人真事，現實中真係有唔少夫妻彼此相愛，但無奈地床上性事不合，仲因為咁而生唔到小朋友。好多人只會認為係女性問題，但其實好多時問題都唔係出係女性身上，可能只係雙方心理問題導致性事不合。

雖然劇集有一兩個裸露場面，但一啲都唔色情。

4. 親密束縛（Bonding）
呢套劇嘅題材係BDSM（施虐/受虐），雖然冇咩裸露鏡頭，但未夠18歲就唔好睇啦～

Photo from IMDb

呢套女主角Tiff有2個身份，日頭係成績優異心理系學生，夜晚就係好有威嚴SM女王，男主角係一個未出櫃嘅男同志，佢被Tiff請嚟做佢嘅助手。兩個主角都有自己唔敢面對嘅野，女主角因為自己嘅身份唔敢同鍾意嘅人談戀愛；而男主角就一直唔敢同人講出自己嘅性向。

Photo from IMDb

呢套劇探索咗好多「LGBT」同「性」嘅話題，好值得一睇。

Photo from IMDb

5. X你的末日世界（The End of the F***ing World）

Photo from IMDb

TEOTFW第一季已經係2017年尾播，嚟緊會有第二季，但日期就仲未定。呢套劇嘅主角係2個憤世嫉俗嘅少男少女離家出走嘅故事。男主角James自認有精神病、一直想試吓殺人，而女主角Alyssa喺屋企得不到愛而決心離家出走。

Photo from IMDb

兩個青少年都對世界有好多不滿，佢地一齊踏上亡命嘅公路次旅。
其實James起初係想對Alyssa落手，但隨住兩人識得耐嚟越耐，佢地嘅友誼亦越嚟越深。

嚟緊3日假期，大家就唔驚悶啦～

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）