人愈大愈難同好友去得成旅行！5大要把握同死黨去旅行嘅原因 唔係嘅話日後可能就再無咩機會～

好多人以為同朋友去旅行係好易、好平常嘅事，但其實人愈大就發現同朋友去旅行變得愈嚟愈難，除咗「愛需要及時」，同死黨去旅行都需要及時。

如果而家仲可以好容易約到朋友去旅行就要好好珍惜，因為之後會有唔同嘅情況，會愈嚟愈難成行，相信唔少人可能都開始深有體會。

Photo from shutterstock

1. 一齊去旅行經歷、回憶係無可取代

一齊去旅行同平時相處係唔同，會日對夜對之餘，旅行仲會發生好多唔同嘅情況，有蝦碌、有搞笑，都有難忘嘅經歷會係旅程中發生，而呢啲回憶將會成為人生中難能可貴嘅記憶嚟，甚至可能因為一次旅行發現大家係「真正嘅朋友」。

Photo from shutterstock

2. 出到社會難夾假去旅行

當大家唔再係學生，出到社會做嘢，要一齊去旅行就要夾大家個時間，睇下公司同事同自己有無撞假、會唔會係公司最忙嘅時間，左夾右夾，可能夾咗成年都未夾到大家都可以去到旅行嘅時間。

Photo from shutterstock

3. 各有伴侶更難成行

到其中一個朋友或自己有咗男朋友或女朋友就更難，因為放到假或有錢都會先預留畀佢地，同埋有啲另一半唔鍾意，變咗可以一齊去旅行就會難上加難。

4. 當中有人準備結婚，就要為咗儲錢少去旅行

如果有人準備結婚，就要儲錢，未必可以洗錢去旅行，一分一毫都要慳住。

Photo from shutterstock

5. 有咗自己嘅家庭，難以拋低小朋友同另一半去旅行

有屬於自己嘅屋企，就好難拋低小朋友同另一半旅行，甚至可能老爺奶奶／岳父岳母知你同朋友去旅行，都會有微言，就變得更難。

所以如果而家仲可以同到死黨去旅行，未必係理所當然會有下一次，所以記得要好好珍惜仲可以同朋友一齊。

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）