【為食香港】 太子搵食地圖 究竟邊三間餃子最好味? 老火湯熬製！芫茜/松茸/松露 新口味餃子

太子一個小區就有十幾間餃子店咁多，臥虎藏龍嘅餃子店絕對係總有一間喺左近！由於Lulu董嘉儀之前都係太子附近住過兩年，對區內嘅餃子店都好熟悉，所以今次小編田就搵埋佢一齊睇吓邊一間先係真正嘅餃子之王！

第三位：豐信餃子店

如果唔想排隊，又想食好味嘅餃子嘅話！呢一間豐信餃子店絕對係唔錯嘅選擇，老闆前身係做布行，因一次機緣巧合之下接手隔離嘅餐廳，又因為太子又係好出名做餃子嘅地區，所以就引發到佢開始呢盤餃子嘅生意。豐信嘅餃子主打11款唔同口味嘅餃子，包括韮菜、雲耳、白菜、椰菜、紫菜、西洋菜、素餃、芫茜、香菇、芝士粟米鮮肉。

每一隻餃子都係由人手逐隻咁包，其中去得最快嘅都係椰菜、韮菜呢啲傳統嘅口味。不過芫茜同香菇呢2款新口味都一樣做得相當唔錯，餡料包得結實唔會皮離餡之餘，仲食到芫茜好清新嘅味道，而香菇味亦食得出用料新鮮，唔會食到一浸澀味，配埋個椰子海帶雞豬骨湯，味道鮮甜，又唔會成口味精，成個感覺都好健康，好有屋企嘅味道。

餃子皮：☆☆☆
餡料：☆☆☆☆
湯底：☆☆☆
總分：3/5

豐信餃子店
地址：太子汝州街17號地下A號鋪
電話：2308 1883

第二位：餃掂手工餃子雲吞專門店

呢間餃子嘅分店係開得最多，而且地方亦相比區內其他餃子舖大，所以入到去都坐得幾舒服。餃掂最正嘅係佢個狀元九鼎湯底，個湯標明唔落味精，用咗粉葛、赤小豆、蘋果、無花果、豬骨，仲有生魚等材料熬製，相當足料又夠補身！

雖然主打松露同松茸餃，但兩款餡料食落去就好一般，無咩驚喜。而松露餃更帶有少少石油氣味，並非筆者嗰杯茶。不過如果食慣濃味嘅朋友，就建議食煎餃啦，因為餃子皮做得好薄，煎香之後脆卜卜，相當香口。

而松茸味道清啲，蒸餃就會相對出色。另外，呢度嘅餃子特色係豬肉比例會多一啲，所以食完幾隻已經好飽肚。

不過試咗咁多款之後，發覺最簡單嘅嘢原來先係最好食。就好似呢度嘅素菜餃，用咗小棠菜、雪菜、木衣等材料包製而成，口感爽脆又唔油膩，跟個狀元九鼎湯底好配合，兩者加埋一齊，先係最好味嘅配搭。

餃子皮：☆☆☆☆
餡料：☆☆☆
湯底：☆☆☆☆☆
總分：4/5

餃掂手工餃子雲吞專門店
地址：太子荔枝角道1號嘉業大廈地下E號舖
電話：23873408

第一位：美味餃子店
呢間開業17年嘅餃子舖，喺區內無人不識！喺美味餃子店好似唔會見到有落場嘅時間，到咗三至五點，門外嘅人龍依舊。呢度嘅湯底主打招牌葛菜生魚豬骨湯，由於老闆娘前係做涼茶舖嘅，所以就係湯裏面加咗野葛菜，味道鮮甜，更加可以清熱解毒活血。

呢度最出色莫過於佢嘅餃子皮，薄得嚟又有一定的韌性，個平衡做得好好，唔似得出面有啲餃子啲皮太薄令餃子餡穿咗，搞到一地都係。

正所謂，貴精不貴多。美味餃子店齋做三款餃子：有雲耳椰菜肉餃、韭菜肉餃及白菜肉餃，雖然好少選擇，但就去得好快，一日仲可以賣九千隻咁多！

而餃子嘅餡料都做得好細緻，無論係白菜、椰菜定韮菜都切到細細粒，比例就係菜多肉少，相當健康。煎餃方面亦做得好有心機，成舊煎餃都煎得好平均，睇得出成塊皮都好黃金，真係少啲耐性都做唔到。

最後當然唔好唔記得食埋呢個辣菜脯，呢個辣菜脯都相當受歡迎，老闆娘隔日就要整一次。如果怕辣嘅話，加醋食都好過癮㗎！除咗無咁辣之餘，仲好開胃，更加食到豆豉同冬菜嘅香味。如果想買返去都得，盛惠$60。

餃子皮：☆☆☆☆☆
餡料：☆☆☆☆☆
湯底：☆☆☆☆
總分：4.5/5

美味餃子店
地址：太子大南街74號地鋪
電話：2309 7308

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）