一連9日都會落雨！下雨天好唔想遇到嘅8個情況 無帶遮行路遇到人地有遮唔肯讓有瓦遮頭個邊

天文台指嚟緊9日都會一直咁落雨，而落雨出街就總會遇到幾種情況，遇到真係會幾唔開心或幾炆。部分情況係如果一眾「遮民」顧己及人，留意下附近情況，相信會容易避免呢啲種種情況！

Photo from 天文台

1. 明明有遮都要行有瓦遮頭嘅位

有時落雨唔記得帶遮，唯有行路睇下有無瓦遮頭嘅一邊行，但總有人會拎住把遮，行有瓦遮頭嘅一邊，見到迎面以來嘅你無遮，唔打算讓路，亦唔收一收把遮，堅持行有瓦遮頭嘅一邊。

Photo from Pinterest

2. 畀車濺到水窪嘅水

就算有遮都可能唔好彩咁濕晒，就係行行下路或等過馬路時，畀車好快咁經過，濺過路邊水窪嘅水，啲水可能仲會令到件衫有少少污跡。

Photo from Pinterest

3. 前面把遮差少少插到人／卸晒啲雨水落嚟
條路多人起嚟就會好迫，前面路人無留意後面，有時會出現差少少插到人，或者遮上嘅雨水卸晒落後面，都會令後面嘅人有少少困惱。

Photo from shutterstock

4. 遇到有路人用力開遮

當開遮個時一下子放開手，好多時就會彈晒啲雨水出嚟，一個唔小心就會彈到側邊嘅路人成身、成臉都係雨水。如果可以就住咁開遮，就唔會令到遮上嘅雨彈到周圍都係。

5. 對鞋都濕到連襪都濕晒

落雨真係好怕會搞到對鞋濕到連襪都濕埋，大雨得制就算有遮都無用，濕晒只可以係office好尷尬咁除鞋除襪整乾佢。如果office係無遮無掩，可能仲要濕都唔可以除，up住up住咁，好辛苦咁。

《延伸閱讀：日本防水又防滑鞋套 簡單易帶出街》

Photo from Pinterest

6. 見到有人將濕嘅遮放落座位到

落雨去食嘢或搭車，偶爾會見到個位濕晒或放咗把濕嘅遮喺上面，如果無睇清楚就坐低，就會成個pat pat濕晒。返工收工呢種繁忙時間，企到攰想坐，見到咁樣無得坐之餘會有少少嬲，明明可以唔將把遮放上去，點解係都要放上去。

7. 放低咗把遮，唔記得拎返

唔少店舖同餐廳門外有個遮架，或去食嘢放喺地下、勾喺枱邊﹐又或者搭車放喺地就好易唔記得。如果出到去停咗雨，會更加易唔記得，然後就會諗都唔知整唔見咗幾多次……

Photo from Pinterest

8. 放把遮喺店舖出面，點知畀人拎走咗

呢個情況就唔係大頭蝦，而係可能有人唔小心拎錯或有心拎走咗，會當下好灰，會有種「點解會係我……」嘅感覺。

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）