集思廣益！5個打工仔射波理由～發燒感冒基本啦！

打工仔年中想請一兩日假做自己嘢、休息下好正常啦～除咗用年假（AL），你又會用咩理由射波呢？

1. 老套嘅發燒感冒

Photo from PressLogic

小編相信打工仔最常用就係呢招！只要你有兩聲咳或者頭暈頭痛，就去睇一睇醫生，拎張醫生紙就可以放一日假，做你想做、要做嘅事！

2. 塞車

Photo from PressLogic

塞車導致返唔到工真係唔係講笑，上年10月港鐵四線齊壞，唔少打工仔都意外放咗「半日假」。所以「地鐵塞車所以返唔到」真係係可行嘅射波原因嚟。如果返工嘅時候遇上交通大擠塞而唔可以準時返工，老細應該都唔會怪你嘅。

3. 屋企人有急事

Photo from PressLogic

「家人有急事」又係一個老細唔可以唔俾你走嘅萬能理由，但你可能會被扣一日AL，不過唔緊要啦，家人緊係重要啲。無論係家人病咗，你要帶佢去睇醫生；定係家人有麻煩，你要去幫佢，用一個AL都唔過份！

4. 覆診

相信好多人都有同感，有時有啲病唔係睇一次醫生就好返，要隔兩日再去覆診。未好返要覆診人之常情，老細都冇理由唔批！

5. 天氣好要野餐

Photo from PressLogic

難得呢幾日天氣幾好，其實唔去野餐真係好浪費，如果要去野餐記得帶遮、著淺色衫呀～因為天氣咁熱，要做好防曬～小編覺得用呢理由射波，明白事理嘅老細會批嘅～

人一世物一世 點可能未試過射波？但只要你係用呢日假期做啲有意義嘅嘢，相信一定係值得嘅！

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）