傳說中嘅雞批浮台！銅鑼灣懷舊茶餐廳，配搭創意小食無得輸～～

聽過雞批浮台呢個菜式好耐，但一直都唔知係乜野嚟。其實係銅鑼灣一間茶餐廳研發，參考英式批嘅食法，加入自家製青豆湯，製造出趣怪小食。老闆蒐集咗唔少懷舊玩意，打造復古味濃嘅餐廳，但配搭新款創意料理，實行嚟個新舊Crossover！

唔好睇個樣青BB，用咗青豆、洋蔥、薯仔等材料新鮮打成，入口濃稠，青豆味好香無草青味。估唔到同雞批咁夾，雞批重牛油味，剩咁食可能會有啲膩，但一齊食可以中和，好夾！

新研發嘅菜式－花膠撈麵。平時我地多數飲湯先食到花膠，點都諗唔到茶餐廳都有得食！仲要係配撈麵！花膠份量好多，每舊都大大片，入口軟腍腍無腥味，有啲似羅漢齋炒麵嘅味

真係好驚喜！花膠配撈麵幾有趣又好味～～而且撈麵唔會太乾，仲有大大粒冬菇添

另一樣招牌就係黑白多士，其實即係黑芝麻醬配煉奶，黑芝麻味極濃，似足芝麻糊！鍾意嘅朋友一定食上癮～～

全店走復古路線，呃like一流！

喜喜冰室
地址：銅鑼灣百德新街57號地舖

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

*本文章的圖片均經其本人或其公司授權，其他媒體不得轉載