陪住觀眾長大！《反斗奇兵4》小朋友會覺得搞笑 大人睇完會明白深層意思 「不要再為不愛你的人奮不顧身」
好多大人同細路都期待咗好耐嘅《Toy Story4》終於就嚟正式上映，唔少觀眾由細細個睇到而家可能已經成家立室，對於好多人嚟講《Toy Story》呢個系列唔止係一個卡通系列，仲係同自己一齊長大、意義重大嘅電影，而今集小朋友睇就係好搞笑嘅卡通，而大人睇嘅就會有另一番體會。
Photo from Disney Movie
《Toy Story 4》強大在於唔同年齡層睇嘅都會有唔同嘅感受，好似話如果比較細個睇覺得係幾得意又搞笑，仲會加咗少少驚嚇情節嘅卡通片，對於由第1集追到而家嘅觀眾講，就會睇出劇情想帶出成長要學習嘅「放棄執著」、「選擇屬於自己嘅道路」。
Photo from Disney Movie
今集講嘅係胡迪喺寶妮屋企，未有好似Andy個時咁受寵愛，只係屬於「其中一件玩具」，而寶妮開始要返幼稚園，仲係胡迪幫助下整咗「小叉」出嚟，但小叉認為自己係垃圾，而唔係玩具，諗盡方法逃離寶妮身邊，胡迪心知小叉對寶妮好重要，就擔任「褓姆」一職，小叉逃走，就設法帶佢返嚟。
Photo from Disney Movie
＊下文含劇透＊
唔少小朋友會著眼係劇情嘅緊張搞笑情節，唔會有悶場，而大人睇到嘅係「被放棄後應該要點？」、「係咪要執著唔屬於自己嘅人與事？」等，甚至係唔應該為咗被需要而拚命，應該係為咗自己嘅快樂而努力。
Photo from Disney Movie
喺今集入面，無邊幾個角色係真正嘅壞人，即使身為反派嘅嘉比嘉比，都有佢可憐嘅地方，而其實佢同胡迪都有共通點，真正想要嘅、追求已久嘅嘢未必盡如人意咁得到，當得唔到係咪仲要死攬住唔屬於自己嘅人或事？
Photo from Disney Movie
而喺嘉比嘉比嘅故事線中，仲講出一個道理，就係好多嘢即使你好想得到，奮不顧身去付出，都未必屬於你。呢個先係現實。由細到大，有唔少童話故事或者會講，有好多事盡力就無憾。其實盡力過又點會無失落？失落完，就要企返起身去搵返真正屬於自己嘅，而唔係喺到「死LUR」。
Photo from Disney Movie
唔再執著、放手，然後再退後去睇，其實可能並非只有一條路，另一條路可能比你原本想行嘅路更好，但當你只著眼死要執著唔屬於自己嘅，分分鐘錯過真正專屬自己嘅路。
好多人都知道呢個道理，但要真係做到嘅人有幾多個？有少少似你愛嘅人並不愛你，咁其實唔一定要揀留喺佢身邊，話唔定前面有一個你愛嘅而佢又愛你嘅人等緊你，只係你死留喺唔愛你嘅人身邊，就唔會遇到佢。
Photo from Disney Movie
好似胡迪咁，身為Andy嘅玩具，佢真係萬千寵愛在一身，係Andy嘅最愛。對於佢嚟講，佢嘅主人就係佢世界嘅全部，佢從來無考慮過另外嘅可能性。到成為寶妮嘅玩具，雖然寶妮無唔珍惜佢，但佢唔似Andy咁將所有對玩具嘅愛集中係胡迪身上，所以胡迪好輕易就感受到差別待遇。
Photo from Disney Movie
有種不被需要嘅感覺，而小叉嘅出現令佢覺得好似重新有個被需要嘅感覺，因為小叉係寶妮寵愛嘅玩具，佢要確保小叉唔會走佬。
但胡迪無諗過係咪只有「被需要」、「被寵愛」呢條路，因為佢以為一直只有呢條路，身為玩具應該只走呢條路，並無思考過可以有其他可能性。
Photo from Disney Movie
雖然好似老生常談咁，但《Toy Story 4》就用搞笑又有少少真實嘅情節去話你聽，令睇呢個系列大嘅80後、90後都會有種戚戚然嘅感覺，因為到呢個年紀都必然經歷過呢個階段，甚至經歷緊。
今集未必好似上集Andy將胡迪讓出個一幕令人落淚，但同樣令長大咗嘅觀眾睇完後陷入沉思。個人而言，呢集都幾適合作為一個系列嘅收結。
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
