日本6間超浪漫婚禮教堂！以6種大自然元素：石、光、海、水、風、冰為主題！
唔知大家有無諗過旅行結婚，又或者去其他國家行禮呢？小編自從上次到輕井澤嘅「石之教堂」一遊後，完全地沉醉其中，因為現場睇實在太震撼，入到去真係忍唔住眼我濕濕啊！
小編仲發現唔單止「石之教堂」，原來日本仲有6間教堂均以大自然元素為主題，單睇相已經非常夢幻，唔知大家睇完之後，又會唔會心思思想去現場結婚行禮呢？
1. 石之教堂
小編當然要私心率先介紹，位於輕井澤嘅「石之教堂」啦！現場絕對係比照片再震撼10倍啊！外表以石塊、木柱及玻璃建造而成，睇落非常沈實，對於中意華麗嘅女生嚟講，外表可能唔夠夢幻。不過等等先！睇埋入面設計就知有幾咁震撼㗎啦！
Photo from www.blestoncourt.com
Photo from www.blestoncourt.com
教堂天花由唔同高低嘅石塊加玻璃構成拱形，如果喺日間舉行婚禮，陽光會從玻璃透入教堂，加上兩邊石牆除咗佈滿草藤外，仲會有緩緩流水，再配上寧靜舒服嘅音樂，場面非常震憾！
Photo from www.blestoncourt.com
Photo from www.blestoncourt.com
喺教堂嘅設計上都好有意思，兩邊石牆草藤及流水代表生生不息，石塊則代表堅強，而玻璃就象徵溫柔，不規則嘅高高低低代表一對新人由認識至結婚嘅磨合，非常神聖且具意義！如果當日並無新人行禮，石之教堂會對外開放，大家可以入去參觀㗎！
Photo from www.blestoncourt.com
Photo from www.blestoncourt.com
2. 冰之教堂
位於北海道TOMAMU渡假村嘅冰之教堂可以話係最夢幻、最特別嘅教堂之一啊！冰之教堂係日本唯一完全由冰雪建造而成嘅婚禮教堂，陽光折射落冰塊嘅光線非常夢幻，世界僅此一座！
Photo from TOMAMU
教堂入面並無常見嘅花束、管風琴、花窗等裝飾，雖然非常簡潔，不過陣陣風聲、流水聲，更顯神聖！於寒冬中穿上純白又高貴嘅禮服，感覺份外純潔華麗！而婚禮後仲會有特製溫酒，回憶一定特別難忘啊！
Photo from TOMAMU
Photo from TOMAMU
不過冰之教堂由於要配合季節，所以只會喺1月中旬至2月中旬開放，有興趣嘅朋友要留意啦！
Photo from TOMAMU
3. 光之教堂
怕凍嘅朋友都仲有好多選擇㗎！位於大阪嘅光之教堂又啱唔啱心水呢？光之教堂係建築大師安藤忠雄成名代表作，亦算係日本最著名建築之一。
Photo from Ibaraki Kasugaoka Church
教堂面積並不大，加上被厚實嘅混凝土包圍，入面近乎漆黑，但正正因為咁，從縫隙中所滲入嘅陽光形成一個十字架，亦係非常著名嘅「光之十字」，感覺猶如神蹟從天降臨人間，從黑暗中更突顯光明，震撼每顆心靈卻得以平靜，感覺難以形容。
Photo from Pinterest
Photo from Pinterest
由於光之教堂目前暫不對外開放，有興趣參觀嘅朋友，記得要提前向教會預約啦！
Photo from Ibaraki Kasugaoka Church
4. 水之教堂
水之教堂曾被譽為「全球結婚教堂夢幻首選」，同樣為世界級建築大師安藤忠雄所設計，與冰之教堂一樣位於北海道TOMAMU渡假村，以「與自然共生」概念設計，教堂正對外面廣闊湖水，而中間佇立嘅十字架猶如浮於水面上，形成「水之祭壇」，配以一對新人於十字架前，從教堂內望過去非常震撼！
Photo from TOMAMU
Photo from TOMAMU
Photo from TOMAMU
另外，教堂更會加上燭光點綴，感覺倍感夢幻。而唔同季節去都有唔同形式㗎，由於踏入冬季，湖面會積滿飄雪，會由「水之祭壇」變成「雪之祭壇」，整體感覺又更為特別！
Photo from TOMAMU
Photo from TOMAMU
5. 海之教堂
位於關西淡路島嘅海之教堂，隱身於路威斯汀飯店二樓一個小角落，並同樣以熟悉嘅混凝土建造而成。
Photo from www.westin-awaji.com
沿飯店指標而行，地上均為藍地毯，加上兩邊牆壁上嘅金水波紋設計，已經充滿「海洋」感。走到教堂內便會出現一個由自然光投影而成嘅大形十字架，突顯於教堂中央，與「光之教堂」相映成趣。雖然教堂同樣不太大，但充滿教堂莊嚴感覺。
Photo from www.westin-awaji.com
仰望天花會見到屋頂縷空十字架，上方會有水波流動，整體感覺仿如置身海洋當中，雙十字架真係極之震撼！而頂樓會見到大海同天空連成一體，隨住鐘塔響起代表祝福嘅鐘聲，噴水池會灑起水花形成彩虹，絕對係充滿幸福感啊！
Photo from www.westin-awaji.com
6. 風之教堂
其實「風之教堂」、「光之教堂」、「水之教堂」都係由同一建築師—安藤忠雄所設計嘅，更被稱為「安藤忠雄教堂三部曲」，而「風之教堂」為第一力作。日本神戶六甲山教堂又名「風之教堂」，由於六甲山山腰六甲東風旅館嘅座園內。
Photo from Pinterest
風之教堂嘅設計較為簡單樸素，由一個教堂、一座鐘塔、一條長走廊以及圍牆組成，玻璃長廊通往教堂內，長廊嘅開口兩端形成風洞設計，當發出聲響就會形成迴音，讓入來嘅人都能感受以風所形造嘅震撼。
Photo from Pinterest
而以鋼筋混凝土所製作嘅十字架，代表着即使風吹都仍然石堅如鐵嘅信念，教堂當中嘅每個部分都能體會大自然與風嘅存在。
Photo from Pinterest
其實去日本教堂行禮並非想像中咁困難，據知台灣有公司可以為香港人籌備日本教堂行禮，而且價錢唔算好貴。不過旅行結婚嘅程序、事項都比較繁複，同時要兼顧觀禮嘅親朋戚友，所以大家記得結婚呢啲重大事情，一定要同伴侶溝通好再決定啊！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
