日本京都祇園花見小路禁止影相！違者罰1萬日圓 因部分遊客之不文明行為

日本京都充滿古代氣息，係好多香港人日本旅遊目的地。而京都除咗伏見稻荷神社、清水寺之外，祇園花見小路都係熱門嘅旅遊景點。

全年都有唔少旅客前往，更少不得要影相留念啦！

不過以後就唔可以咁隨便影喇！因為祇園町南側地區協會宣布由即日起禁止喺私人道路拍影相。

Photo from PressLogic

祇園花見小路都係充滿傳統氣息嘅建築，有商店、餐廳，亦都有民居，平時亦會有藝妓、舞妓喺路上行過。

Photo from PressLogic

隨住遊客數量漸多，有部分旅客唔守秩序，唔止闖入私人地方影相，甚至會影路過嘅藝妓、舞妓，影響到住喺附近嘅居民。

為咗避免對附近居民造成滋擾，於是就立告示提醒遊客唔好擅自喺花見小路私人道路上影相，國土交通省亦都同京都市政府合作，喺上月起試行喺花見小路一帶向旅客手機send禮儀信息，提醒佢哋未經許可唔好擅自影藝妓、舞妓同進入私人地方。

Photo from PressLogic

不過成效似乎唔大，於是祇園町南側地區協會決定豎立新告示牌，提醒遊客未經許可唔好喺花見小路私人道路上影相，違者將會罰1萬日圓（約港幣$721）。

Photo from PressLogic

新例已經喺10月25號生效，大家以後去花見小路要留意喇！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）