杜汶澤同阿叻一黑一白現身開live 阿叻支持成立獨立委員會 近30萬人睇直播

琴日港台宣布今日《視點31》將邀請杜汶澤同阿叻陳百祥一齊開live，一個反警暴，一個撐警。

兩人一黑一白出席，襯到絕。

開live之前，阿澤喺Facebook出post表示感謝市民對佢嘅支持。

而一開始兩位表情嚴肅，態度平靜。

後來開始正式討論，阿澤開始激動，講到有7成受訪者反警暴，叻哥表示唔信呢個民調，阿澤激動：「你真係唔識㗎喎！」

Photo from 香港電台

喺討論過程中阿澤不停飲水，而阿叻就認為警察係止暴制亂，需用暴力解決。

提到有藝人因表態而「被封殺」，阿叻指從未見過，而杜汶澤就話：「小弟就係一位。」

雙方就「721元朗」、「選特首」、「成立獨立委員會」、「警員委任證」、「記者證」等話題展開討論。

Photo from 香港電台

不過大家似乎話不投機半句多，講到「選特首」嘅議題，阿叻發表偉論後，主持作小總結，阿澤十分疑惑問主持：「你真係知佢講緊乜？」

而阿叻就表示支持成立獨立委員會調查事件，不過時間就要喺所有事情完結之後，而阿澤表示：「終於有一個觀點係相同。」

整個過程中阿澤果然信守承諾，無講過一句粗口。不過到後面杯水飲晒阿澤就開始半放棄，全部「贊成」阿叻嘅觀點。

Photo from 香港電台

最後主持人感謝兩位出席，阿澤向主持人講：「你真係要多謝我，我上嚟係非常受氣。」而阿叻亦話：「你要多謝我，我本來無必要上嚟。」

晚上8點，港台31將播出精華版。

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）