【香港好去處】DesignInspire集「懷舊」「環保」於一身 提倡保育文化！1比1招牌及手寫小巴牌打卡位+傳統工藝工作坊 超吸引！

依家潮流興懷舊同環保，保留咗歲月痕跡之餘，如果加入創新、玩味等元素，絕對可以成為一件有價值、有意義嘅藝術品！

邊到有得睇？講緊係DesignInspire創意設計博覽啊！

呢個展覽有好多香港同環球設計師作品，包括建築、數碼、體驗、平面、工業、空間，以至城市文化設計等。當中嘅「香港創意力量」展區今年繼續獲得香港特別行政區政府「創意香港」贊助，同年青設計師以及本地多個機構如聖雅各福群會、香港展能藝術會等合作，展出一系列有關文化傳承同環保創新嘅裝置及作品。

小編推介必到嘅重點打卡位：坐在紅Van的日子-手寫小巴牌牆

一定要推介嘅打卡位，非呢面手寫小巴牌牆莫屬喇！從事手寫小巴「水牌」40年嘅麥錦生師傅，由起初以手寫小巴「水牌」呢門手藝維生到依家，將佢視為興趣，希望可以畀更多人認識紅Van文化，帶出保育嘅訊息～麥先生見證過紅Van最風光時刻，全港一共有800架紅Van。大家千祈唔好錯過同咁有歷史價值嘅文化icon合影！

Photo from HKTDC

另外，「街招」打造咗個1比1嘅招牌打卡位，將被拆卸舊式招牌翻新，保留香港招牌嘅獨特性！大家去打卡之餘，記得好好留意招牌上嘅書法、材料仲有霓虹燈嘅工藝，因為呢啲傳統手工漸漸式微，好快就會消失，可能遲下想睇都未必睇到～DesignInspire仲有一連串嘅傳統工藝工作坊，可以學整當鋪招牌咖！喺眾多嘅香港招牌入面，「幅鼠吊金錢」嘅當鋪招牌就最吸引！唔單知顏色繽紛、形狀突出，加埋霓虹燈，就更耀眼！透過呢個當鋪招牌製作工作坊 ，你可以學識整招牌嘅技巧，製作屬於自己嘅當鋪招牌，親手將呢啲手藝繼續流傳落去！

Photo from HKTDC

Photo from HKTDC

「香港創意力量」展區嘅另一個項目係同嚟自唔同範疇嘅本地年青設計師合作嘅「一『物』相承」，總共有26位本地年青設計師參加，佢哋同上一輩嘅老師傅合作，做出19件融合傳統工藝概念嘅創意作品，其中小編推介白鐵信箱花藝！

白鐵信箱代表咗以前嘅人對收信嘅熱切期待同喜悅。創作者感概：現今社會已經好少人用寄信聯繫，白鐵信箱象徵過時，好似同用嚟表達祝福、示愛嘅鮮花一樣，完成使命後就會被遺棄！」所以佢用回收花，以傳統乾花手工藝，以及現代嘅樹脂膠封存技術，化身為集時鐘同花瓶於一身嘅白鐵信箱，寓意將兩款喜悅永續留存！

Photo from HKTDC

欣賞完白鐵信箱花藝，你亦可以參加埋同花藝有關嘅工作坊-個人化紙花藝術體驗班。花，可以向心儀嘅人表達心意！透過呢個工作坊，你可以留低屬於你自己嘅心聲，將心意長留～

Photo from HKTDC

精彩既工作坊有點止咁少，鍾意手作飾物嘅你一定唔可以錯過創意皮革手帶工作坊！工作坊將數碼印花技術同埋一個由Brother出品嘅創意裁剪機放喺皮革手工藝上面，突破剪裁嘅局限，喺皮革加上精美打印配合埋匠心嘅剪裁，導師仲會教你特色織帶效果，等大家都可以打造獨一無二嘅個性化皮革手帶。

Photo from HKTDC

文青們，記得唔好錯過呢個展覽啊！

DesignInspire
地點：香港會議展覽中心 
日期及時間：
2019年12月5日（星期四）-2019年12月6日（星期五） 上午9:30 - 下午7:00
2019年12月7日（星期六） 上午9:30 - 下午6:30

立即免費登記入場！

免責聲明：香港特別行政區政府僅為本項目提供資助，除此之外並無參與項目。在本刊物／活動內（或由項目小組成員）表達的任何意見、研究成果、結論或建議，均不代表香港特別行政區政府、商務及經濟發展局通訊及創意產業科、創意香港、創意智優計劃秘書處或創意智優計劃審核委員會的觀點。 

「香港創意力量」展區贊助單位:

Presented by：HKTDC