日本新推《哈利波特》主題校服 秒變霍格華茲魔法學校學生！

睇日劇嗰陣成日都覺得日本嘅校服好好睇，著咗就感覺好青春。

其實普通人都可以買到日劇入面嘅日本學生校服～日本服裝品牌EASTBOY就有推出各種制服。

好多日劇入面飾演高中生嘅藝人著嘅就係呢個品牌嘅校服，係日本超人氣嘅品牌。

EASTBOY最近就聯乘《哈利波特》，推出一系列主題校服，造工超精緻！哈利波特fans必入手！

西裝外套 日圓38,000円（+稅）

Photo from EASTBOY

西裝外套係日本校服嘅標準配搭，而哈利波特風校服一共有兩款，分別係黑色同深灰色。

外面繡上霍格華茲嘅校徽，內襟有葛來分多嘅代表顏色紅色同金色（深灰色西裝外套內襟係史萊哲林嘅代表色：綠色同銀色）。

開胸針織冷衫 日圓10,000円（+稅）

Photo from EASTBOY

套頭針織冷衫 日圓9,000円（+稅）

Photo from EASTBOY

除咗西裝外套，日本校服嘅代表絕對係針織冷衫，針織冷衫一共有兩種，一款開胸冷衫、一款套頭冷衫，每款有4隻色：米黃色、灰色、白色、深藍色。

同樣都繡上霍格華茲校徽，另外左袖亦有EASTBOY嘅LOGO—自由女神刺繡。

運動外套 日圓7,900円（+稅）

Photo from EASTBOY

Photo from EASTBOY

另外亦都有運動外套，有兩款，分別係衛衣同針織外套，每款4隻色：紅色、綠色、灰色、藍色。

衛衣繡有《Harry Potter》LOGO，而針織外套就繡咗代表哈利波特嘅眼鏡同閃電。

領帶 日圓2,900円（+稅）

襪 日圓1,800円（+稅）

Photo from EASTBOY

提到日本校服，領帶係必備！女仔嘅蝴蝶結同男仔嘅tie都分別有4隻色，對應霍格華茲4個學院：葛來分多（紅色同金色）；史萊哲林（綠色同銀色）；赫夫帕夫（黃色同黑色）；雷文克勞（藍色同灰色）。

襪都有兩隻色，分別係黑色同深灰色。

有齊一套校服都仲要配埋袋先得㗎！有兩款袋：單肩包、手提袋。

Photo from EASTBOY

單肩包 日圓7,900円（+稅）

外面同內袋顏色有紅色、綠色、黃色、藍色分別4種色，對應霍格華茲4個學院。

手提袋 日圓3,900円（+稅）

至於手提袋都係分紅色、綠色、黃色、藍色4種色，袋面仲印有霍格華茲4個學院嘅守護神：葛來分多（獅子）；史萊哲林（蛇）；赫夫帕夫（獾）；雷文克勞（鷹）。

呢一系列《哈利波特》主題校服會喺12月6號推出，款款都好時尚，成為霍格華茲魔法學校學生無難度喇！

資料來源：EASTBOY

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）