陳小春仔仔6歲Jasper去應采兒故鄉台灣讀幼稚園 傳因香港近來情勢惡化

陳小春同應采兒嘅仔仔Jasper喺2017年上過大陸綜藝《爸爸去哪兒5》，陳小春父子喺節目播出後大受歡迎。

更再度出演新一季《爸爸去哪兒6》，不過有傳因為大陸禁止明星帶子女參加節目，所以《爸爸去哪兒6》被禁，至今未能播出。

陳小春曾任惠州市政協委員，亦都有份拍攝「香港加油：拒絕暴力，守護香港」廣告，呼籲選民投票表態，係獲國家認證嘅「愛國藝人」。

Photo from 《人民日報》微博

而陳小春本人當然都有參與投票，更影低選票同投票印章放上微博並留言：「堂堂正正的香港人」。不過涉嫌違法嘅佢事後即刻del相。

而愛國嘅陳小春近日被台灣媒體發現帶埋6歲嘅Jasper去台灣短暫居留，台灣係應采兒故鄉，Jasper現時喺媽媽應采兒就讀過嘅幼稚園度返學。

Photo from 陳小春微博

台媒更影到應采兒親自送仔仔Jasper返學，據報呢間幼稚園嘅學費一個學期要10萬近台幣（約港幣$2.5萬）。

Photo from 《爸爸去哪兒》微博

當日Jasper跟同學一齊量體溫，又同幼稚園園長打招呼，睇落已經適應當地嘅生活。

Photo from 《爸爸去哪兒》微博

「陳小春家的Jasper粉絲團」嘅微博琴日亦上載咗Jasper喺台灣國父紀念館放風箏嘅相。報導又指因為香港近來情勢喺呢1、2個月惡化得非常嚴重，所以決定全家先暫居喺應采兒故鄉台灣。

Photo from 陳小春家的Jasper粉絲團微博

不過Jasper今年6歲，喺香港本身係讀緊小學二年級，低去咗台灣後就再讀返幼稚園，未知佢地會喺台灣住到幾時。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）