12月必去澳門國際幻彩大巡遊！大巡遊/VIVA嘉年華/狂野派對盡情玩

澳門今年12月真係有好多精彩節目！不過講到當中最最最不能錯過嘅，一定係12月8日舉行嘅「澳門國際幻彩大巡遊」啦！大巡遊係慶祝澳門回歸嘅年度重點節目，今年適逢係澳門回歸20周年，當然係前所未有咁盛大啦！

Photo from MGTO

巡遊路線於當日15:00由大三巴牌坊出發，途經南灣湖景大馬路嘅VIVA嘉年華，最後18:30喺西灣湖廣場舉行「愛‧和平‧文化共融」回歸慶典派對。大家可以跟住巡遊隊伍玩足大半日，同世界各地嘅朋友一齊感受熱鬧精彩嘅澳門！

第一站：大三巴牌坊出發

Photo from MGTO

大巡遊以「一帶一路」為主題，場面同氣勢不同凡響！今年表演隊伍來自一帶一路沿線共19個國家，包括葡萄牙、肯亞、安哥拉、烏克蘭、波蘭、白俄羅斯、匈牙利、智利、賽浦路斯、意大利、俄羅斯、緬甸等，聯同澳門團隊逾1800人一齊演出，認真「大陣仗」！

大家可欣賞到巡遊隊伍帶來嘅精彩表演，包括肯亞高難度雜技、俄羅斯彈跳雜技、葡萄牙高蹺及肢體劇等，刺激有趣，同時認識多國風情！更可穿梭澳門特色老巷、歷史名區，好似係大堂前地、玫瑰聖母堂等，熱鬧中感受澳門之美！

Photo from MGTO

Photo from MGTO

第二站：南灣湖景「VIVA嘉年華」

巡遊隊伍第二站會到達南灣湖景大馬路嘅「VIVA嘉年華」！現場有巨型汽偶、動感演出、攤位遊戲等，仲有個多個神秘藝團同大家High到盡！巡遊隊伍到時會出盡渾身解數競逐獎項，相信必定高潮迭起！咁多好節目，擔心玩得太累？今年大會特設觀眾座位區，大家可以坐定定觀賞表演同休息㗎！

Photo from MGTO

尾站： 西灣湖廣場「愛‧和平‧文化共融」回歸慶典派對

玩足半日，終於嚟到全日壓軸時刻—回歸慶典派對啦！世界各地同本地嘅巡遊隊伍將會共聚西灣湖廣場，以「愛、和平、文化共融」為澳門慶祝回歸！

Photo from MGTO

節目咁精彩，真係未睇已經興奮！你仲唔快啲約埋屋企人朋友，一齊參與呢場年度盛事？

澳門國際幻彩大巡遊

日期及時間：12月8日（星期日）下午3時至7時

地點：澳門大三巴至西灣湖廣場

費用：免費

活動詳情：www.icm.gov.mo/macaoparade

Presented by MGTO