打工仔福音？芬蘭總理提倡新縮短工時政策　望上班族多啲時間陪家人

每日嘅工作時間少啲，多啲時間陪吓屋企人或見吓朋友，相信係唔少打工仔嘅心聲嚟～

不過喺香港依個急速嘅城市都應該冇咩可能發生，之但係喺講求慢活，將工作同生活兩者之間取得平衡嘅北歐嚟講，又好似行得通喎！

早前芬蘭總理Sanna Mari就提倡國家推行4天工作制及每日只工作6小時嘅新政策！

Photo from Sanna Marin

其實早喺1996年芬蘭就有畀員工彈性上班時間，公司可以畀員工三小時提早或延遲上班時間嘅彈性。

Photo from HoildaySmart

而今次Sanna Marin提出依個每個星期只工作24小時嘅新政策，係希望可以畀打工仔有多啲私人時間，可以陪吓屋企人或見吓朋友。

不過又點止得芬蘭有類似嘅政策呢～

2000年時法國就已經將標準工時由每週39小時調低至35小時；2015年瑞典就正式推行每日工作6小時制度...等

Photo from HolidaySmart

而嚟緊喺日本嘅大阪亦會強制要求公務員準時收工嘅計劃，從而提升工作效率，回歸正常生活。

另外，早前英國工黨亦以此作為當選後推動嘅政策條件吸引支持者，英國工黨指當選後將會喺10年內推行每週工作32小時嘅制度。

Photo from HolidaySmart

除咗由政府推行嘅工時政策之外，一啲如日本微軟、紐西蘭Perpetual Guardian等私人企業亦有試行縮短工時計劃，結果顯示有效激勵員工嘅生產力，成長幅度接近40％。

Photo from 《我要準時下班》

對香港嘅打工仔嚟講真係太吸引喇，但要喺香港實行又好似真係冇咩可能！

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）