口渴樹熊趴喺馬路上舔積水 澳洲百年一遇大雨引發水浸 有人被洪水圍困

澳洲山火延燒幾個月之後，最大火場火勢終於受控。

但一波未平一波又起，雖然澳洲多地都有落雨，但百年一遇嘅雨量引發水災。

山火引致森林被燒毀，破壞好多野生動物嘅棲息地，包括屬於易危物種嘅樹熊。

Photo from AFP

日前喺火災嚴重嘅新南威爾士州就有網民發現有樹熊喺馬路上遊盪。

Photo from Pamela Schramm

原來樹熊係喺馬路嘅凹陷處搵啲積水嚟飲。樹熊向來都好少飲水，佢嘅名喺本來解「唔飲水」，通常會通過尤加利樹葉（桉樹葉）攝取水份。

Photo from Pamela Schramm

但大火將佢哋賴以為生嘅樹木燒毀，無辦法得到足夠嘅水份，唯有周圍搵水飲。

Photo from Pamela Schramm

但馬路上車來車往，非常危險。網友Pamela Schramm想將佢帶返去安全嘅地方，不過樹熊太想飲水所以帶唔走佢。

由於太關心樹熊嘅狀況，Pamela Schramm搵咗動物醫護人員嚟檢查樹熊嘅身體狀況。好彩醫護人員指樹熊嘅健康應該無大礙。

Photo from Reuters

澳洲東部有大雨引發水浸，喺昆士蘭黃金海岸附近，星期六雨量達到300毫米，更有人被洪水圍困。

Photo from Al Jazeera

當地氣象部門指部分地區出現百年一遇嘅雨量，舒緩多月嚟嘅乾旱同山火，不過維多利亞洲仍有部分山火火勢未受控。

Photo from Qld Fire & Emergency

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）