多人遊戲狼人殺玩法及角色介紹 拜年可以同親戚一齊玩啦！

牛年長假期，大家拜年時必定會玩魚蝦蟹、啤牌、打麻將，但自從考智力和心計的狼人殺遊戲出現後，一班後生仔就會玩新遊戲。等記者今次講解一下狼人殺玩法，等你哋去聚會時可以一齊玩啦！

其實狼人殺呢個遊戲唔係新嘢，不過近年台灣綜藝節目「娛樂百份百」同無綫嘅「娛樂大家」都有玩，令到狼人殺風氣上升。

Photo from 娛樂百份百

Photo from 娛樂大家

其實狼人殺有好多玩法，有人會專登買一副狼人殺咭牌，亦會有人用啤牌嚟代替，後者可以自訂角色，今次就教大家一個常規見到嘅玩法啦。

遊戲可以少至8人，多至18人參與，正常遊戲時間約20分鐘，當然愈多人玩就需要花愈多時間啦。

Photo from shutterstock

遊戲入面有4個狼人、13個市民、仲有小女孩、邱比特、女巫、警長、占卜師、獵人各一。只要所有市民或狼人一方死晒，遊戲就完結。

各個角色功能：

1. 狼人

喺入黑嘅時候，狼人可以指出一位玩家並將佢殺死，天光時則要保護自己身份，以免被指證。

2. 市民

一般嚟講市民並無功能，只可以喺天光時一齊討論邊個係狼人，並將其指證出嚟。

3. 小女孩

可以喺天黑時偷偷開眼觀察，但只要被狼人發現就會死亡。

4. 邱比特

可以將兩個玩家結為情侶，只要其中一方死，另一個就會因太傷心而死去。

5. 女巫

女巫可以製造解藥同毒藥，前者可以救活一個被狼人殺死嘅人，後者則可以喺天黑時殺人。（每種藥水只能用一次）

6. 警長

警長可以喺選出狼人時有2票，死後可以指名一位生存者繼任。

7. 占卜師

一到天黑，占卜師可以查看一名玩家身份，協助市民搵出狼人。

8. 狼人

被市民或狼人殺死時，可以選一位玩家陪葬。

Photo from shutterstock

注意：遊戲需要搵一個人做主持，主持要帶領遊戲「入黑」同「天光」，記住天黑時所有人都要閉眼，然後再根據主持所講嘅角色順序去進行遊戲。喺正式開始之前，主持人會要求邱比特事先選定情侶，並要拍被選中者嘅膊頭示意。