【愛的迫降】玄彬係絕種好男人！真高富帥+行善低調 總資產或超過130億！

最近《愛的迫降》熱爆全球！飾演靚仔有錢北韓軍官嘅玄彬，對因為滑翔傘事故而逼迫降落喺北韓嘅有錢女尹世理（孫藝珍飾演）照顧有加，非常細心。有時仲會因為尹世理而呷醋，或者因為佢嘅一個小動作而沾沾自喜，非常可愛，簡直係好男人嘅典範～引死一班「玄太」啦！

Photo from 《愛的迫降》

Photo from 《愛的迫降》

現實中，玄彬都係個絕種好男人，而且係真·高富帥！有韓國傳媒透露，估計佢嘅總資產超過130億韓圜（即約8700萬港元）！唔止啊，佢7年前仲拎過「年度儲蓄獎」，嗰陣時已經有35億韓圜（約2300萬港元）嘅流動資金，連埋佢嘅已經升咗值嘅物業等，總資產已經超過130億～肯儲錢嘅男人，真係特別吸引咖～

Photo from IG@Vast Ent

Photo from IG@Vast Ent

另外，武漢肺炎喺韓國爆發嘅時候，唔少韓國藝人公開表示自己有捐錢，助民眾抗疫！玄彬曾經喺社交網站表示關注新型冠狀病毒肺炎，被網民大鬧唔捐錢抗疫～但原來，佢喺2月底透過社會福利機構捐咗2億韓圜（即約130萬港元）幫助市民！佢專登叮囑社會福利機構唔好對外宣揚，就連自己嘅經理人公司都唔知情，直至畀傳媒查到先發現佢做咗呢項善事！

Photo from IG@Vast Ent

佢除咗係真嘅高富帥之外，仲要行善低調，唔會廣為宣傳自己做善事，顯得佢為人踏實，簡直係絕種好男人啊！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）